Պարեկները տաք հետքերով հայտնաբերել են ռուսական համարանիշերով ավտոմեքենայի օրինախախտ վարորդին

ՀՀ ներքին գործերի նախարարության ոստիկանության պարեկային ծառայությունը բազմիցս հորդորել է վարորդներին պահպանել ճանապարհային երթևեկության կանոնները, ինչը, առաջին հերթին, բխում է հենց վարորդների շահերից։

 Պարեկային ծառայությունը բազմիցս հայտնել է նաև, որ պարեկները չեն հանդուրժի այն օրինախախտ վարորդներին, ովքեր թեկուզ կլինեն օրենսդիր կամ գործադիր, ուժային կամ հանրությանը հայտնի մարդիկ։Այսօր՝ հուլիսի 13-ին, ՀՀ ՆԳՆ ոստիկանության Պարեկային ծառայության Երևան քաղաքի գնդում օպերատիվ տեղեկություն են ստացել, որ «Belgee X50» մակնիշի ավտոմեքենայով երթևեկելիս ուղևորը մարմնի մի հատվածով դուրս է եկել տանիքից, ինչը ճանապարհային երթևեկության կանոնների կոպիտ խախտում է։

Ինչպես հայտնում է ֆոտոլրագրող Գագիկ Շամշյանը, ՊԾ Երևան քաղաքի գնդի հետախուզական խմբի պարեկները տեղում պարզել են, որ նշված ավտոմեքենան ուղևորվում է դեպի Արագածոտնի մարզ, և տաք հետքերով հայտնաբերել են այն, ինչի համար վարորդը ենթարկվել է վարչական պատասխանատվության։