Մեծ Բրիտանիան միանում է Ուկրաինայի համար նախատեսված 90 միլիարդ եվրոյի ռազմական ծրագրին

Միացյալ Թագավորության կառավարությունը համաձայնության է եկել Եվրամիության իշխանությունների հետ՝ Ուկրաինայի ռազմական ֆինանսավորման 90 միլիարդ եվրո արժողությամբ ծրագրին միանալու վերաբերյալ։

Միացյալ Թագավորության վարչապետ Քիր Սթարմերի գրասենյակի հայտարարության մեջ, որը հաղորդում է ՏԱՍՍ-ը, նշված է. «Այս ծրագրի շնորհիվ բրիտանական պաշտպանական ընկերությունները հնարավորություն կստանան մասնակցելու այս վարկի հաշվին ֆինանսավորվող պայմանագրերի ստացման տենդերներին, ինչը հասանելիություն կբացի մի քանի միլիարդ եվրոյի պոտենցիալ ներդրումների համար, կապահովի որակյալ աշխատատեղերի պահպանումը ողջ երկրում և կամրապնդի աշխարհում առաջատար դիրքեր ունեցող Մեծ Բրիտանիայի ռազմարդյունաբերական բազան։ Մեծ Բրիտանիայի ներդրումը նախաձեռնության մեջ համամասնական կլինի այն պայմանագրերի արժեքին, որոնք բաժին կհասնեն բրիտանական արտադրողներին»։

Այս հայտարարությունը հրապարակվել է Փարիզում ընթացող «ցանկացողների կոալիցիայի» գագաթնաժողովին Մեծ Բրիտանիայի վարչապետ Քիր Սթարմերի մասնակցության ֆոնին։ Եվրահանձնաժողովի ղեկավար Ուրսուլա ֆոն դեր Լայենը X սոցիալական ցանցում արված հրապարակման մեջ ընդգծել է, որ դա Ուկրաինային հնարավորություն կտա օգտվել ռազմական մատակարարների ավելի լայն ընտրությունից։

ԵՄ-ի կողմից 2026-2027 թվականների համար նախատեսված Ուկրաինայի ռազմական ֆինանսավորման 90 միլիարդ եվրոյի ծրագիրը հաստատվել էր 2025 թվականի դեկտեմբերին։ Այդ միջոցներից 30 միլիարդ եվրոն ուղղվելու է Կիևի բյուջետային կարիքներին, իսկ 60 միլիարդ եվրոն՝ ռազմական ծախսերին։ Նշված ծրագիրը ընդունվել է Եվրահանձնաժողովի այն ձախողված պլանի փոխարեն, որով առաջարկվում էր Կիևի ռազմական կարիքները ֆինանսավորելու նպատակով բռնագրավել Եվրոպայում սառեցված ՌԴ Կենտրոնական բանկի ակտիվները։ Այս 90 միլիարդ եվրոն հայթայթվելու է համաեվրոպական փոխառության միջոցով, որի սպասարկումն ու մարումը կատարելու են ԵՄ անդամ երկրները։ Կիևին այս գումարը տրամադրվելու է անհատույց՝ այն պայմանով, որ նա պետք է փոխհատուցի դրանք, եթե Ռուսաստանը ամբողջ ծավալով վճարի ռեպարացիաները։

Նախկինում Եվրահանձնաժողովի ներկայացուցիչ Թոմա Ռենյեն պարզաբանել էր, որ Բրյուսելի կողմից մշակված Ուկրաինայի ռազմական ֆինանսավորման ծրագրում առկա է «գնիր եվրոպականը» հոդվածը։ Այս դրույթի համաձայն՝ Ուկրաինան պարտավոր է այդ միջոցներով սպառազինության գնման բոլոր պայմանագրերը ներկայացնել Եվրահանձնաժողովի հաստատմանը։ Միայն այն դեպքում, երբ Կիևին անհրաժեշտ զինատեսակները կամ դրանց համապատասխան փոխարինիչները բացակայում են Եվրոպայում, Եվրահանձնաժողովը կարող է թույլատրել Ուկրաինային դրանք պատվիրել այլ երկրների մատակարարներից։