Դավիթ Ղազինյանի գործով նախաքննությունը մոտենում է ավարտին․ «Արմլուր»

Հակակոռուպցիոն կոմիտեն առաջիկայում նախատեսում է հայտարարել «Ուժեղ Հայաստան» դաշինքի պատգամավորի թեկնածու Դավիթ Ղազինյանի վերաբերյալ քրեական վարույթի նախաքննության ավարտի մասին։ Այս մասին հայտնում է Armlur.am-ը։

Ըստ հրապարակման՝ Դավիթ Ղազինյանը ներկայում գտնվում է ԱԱԾ մեկուսարանում։ Հիշեցնենք, որ հունիսի 6-ին Հակակոռուպցիոն կոմիտեն հայտնել էր, որ ստացված տվյալների համաձայն՝ Դավիթ Ղազինյանը և «Ուժեղ Հայաստան» կուսակցության Արաբկիրի գրասենյակի պատասխանատու անձինք, նախնական համաձայնությամբ, ընտրողներին խոստացել և տվել են ենթադրյալ ընտրակաշառք։

Կոմիտեն նաև հրապարակել էր համապատասխան ձայնագրություն։ Դեպքի առթիվ նախաձեռնվել էր քրեական վարույթ, որի շրջանակում իրականացվել էին խուզարկություններ, ձերբակալվել էին մի շարք անձինք, իսկ հետագայում Դավիթ Ղազինյանի նկատմամբ որպես խափանման միջոց ընտրվել էր կալանքը։

Ղազինյանը չի ընդունում իրեն առաջադրված մեղադրանքը՝ պնդելով, որ ընտրակաշառք չի տվել և գործի հիմքում դրված պնդումներն իրականությանը չեն համապատասխանում։ Ըստ Armlur.am-ի՝ առաջիկայում քրեական վարույթով կհայտարարվի նախաքննության ավարտը, որից հետո գործը կարող է ուղարկվել դատարան՝ ըստ սահմանված ընթացակարգի։