Bloomberg․ OpenAI-ն Apple-ից ներգրավել է ավելի քան 400 աշխատակցի

OpenAI-ն վերջին տարիներին Apple-ից աշխատանքի է հրավիրել ավելի քան 400 նախկին աշխատակցի, ինչը դարձել է երկու ընկերությունների միջև սրվող հակամարտության պատճառներից մեկը։ Այդ մասին հայտնում է Bloomberg-ը։

Պարբերականի տվյալներով՝ OpenAI-ին են անցել մասնագետներ, որոնք նախկինում աշխատել են iPhone, Apple Watch, AirPods և ընկերության այլ առանցքային նախագծերի վրա։ Որոշ ստորաբաժանումներում կադրերի արտահոսքն այնքան մեծ է եղել, որ Apple-ը ստիպված է եղել վերակազմավորել մշակողների թիմերը։

Bloomberg-ի տեղեկություններով՝ աշխատակիցների հեռանալը կանխելու նպատակով Apple-ը բարձրացրել է բոնուսները, իսկ առավել արժեքավոր մասնագետների հետ բանակցություններին անձամբ մասնակցել են ընկերության բարձրագույն ղեկավարները։ Սակայն OpenAI-ն շարունակել է ներգրավել Apple-ի աշխատակիցներին՝ առաջարկելով ավելի շահավետ պայմաններ։

Այս ֆոնին Apple-ը դատական հայց է ներկայացրել OpenAI-ի դեմ՝ մեղադրելով ընկերությանը նաև մշակման փուլում գտնվող արտադրանքների վերաբերյալ առևտրային գաղտնիքներ ապօրինի ձեռք բերելու մեջ։ OpenAI-ն հերքել է մեղադրանքները՝ հայտարարելով, որ չի հետաքրքրվում այլ ընկերությունների գաղտնի տեղեկատվությամբ։

Ավելի վաղ երկու ընկերությունների համագործակցությունը՝ կապված Apple-ի արտադրանքներում OpenAI-ի արհեստական բանականության տեխնոլոգիաների ներդրման հետ, նույնպես ավարտվել էր անհամաձայնություններով։