Վահագն Խաչատուրյանը Մակրոնին շնորհակալություն է հայտնել Հայաստանի աջակցման համար

Հանրապետության նախագահ Վահագն Խաչատուրյանը Ֆրանսիայի Ազգային տոնի՝ Բաստիլի գրավման օրվա առթիվ շնորհավորական ուղերձ է հղել Ֆրանսիայի նախագահ Էմանուել Մակրոնին։

Նախագահը նշել է, որ հուլիսի 14-ը խորհրդանշում է ազատության, մարդու իրավունքների, հավասարության և ժողովրդավարության արժեքները, որոնք կարևոր նշանակություն ունեն նաև Հայաստանի համար։

Վահագն Խաչատուրյանը գոհունակությամբ ընդգծել է, որ Էմանուել Մակրոնի նախագահության տարիներին հայ-ֆրանսիական հարաբերությունները վերաճել են ռազմավարական գործընկերության և հաջողությամբ զարգանում են տարբեր ոլորտներում։

Ուղերձում նախագահը խորին երախտագիտություն է հայտնել Ֆրանսիային և անձամբ Էմանուել Մակրոնին՝ Հայաստանին ցուցաբերվող հետևողական աջակցության, Հայաստան-Եվրամիություն գործընկերության խորացմանը նպաստելու, Հայաստանի ինքնիշխանության և տարածքային ամբողջականության պաշտպանության, ինչպես նաև Հարավային Կովկասում խաղաղության օրակարգի առաջմղման գործում որդեգրած սկզբունքային դիրքորոշման համար։