Ծովախեցգետին ուտելուց հետո կինը կորցրել է ազդրի և հետույքի մի մասը
Հասարակություն
ԱՄՆ բնակչուհի Լեյսի Փեփերը ծանր բակտերիալ վարակի հետևանքով կորցրել է ազդրի և հետույքի մկանների մի մասը, ինչպես նաև սեռական օրգանների մի հատվածը։ Նրա պատմությունը հրապարակել է Daily Mail-ը։
Կնոջ խոսքով՝ 2024 թվականի ապրիլին նա ռեստորանում կերել է թերի պատրաստված ծովախեցգետիններով ուտեստ։ Մի քանի ժամ անց նրա մոտ ի հայտ են եկել ոտքերի ուժեղ ցավ, փսխում, դող և բարձր ջերմություն։ Հաջորդ օրը ձախ ոտքը պատվել է կարմիր բշտիկներով, ինչից հետո նա դիմել է հիվանդանոց։
Բժիշկները նրա մոտ ախտորոշել են նեկրոտիկ ֆասցիիտ՝ վտանգավոր բակտերիալ վարակ, որն արագորեն ոչնչացնում է փափուկ հյուսվածքները։ Կնոջ կյանքը փրկելու համար բժիշկները ստիպված են եղել հեռացնել ձախ ազդրի և հետույքի մկանների շուրջ 25 տոկոսը, ինչպես նաև ձախ կողմի սեռական օրգանների 50 տոկոսը։
Այնուհետև Փեփերը ենթարկվել է 17 վերականգնողական վիրահատության, իսկ մեկ ամիս անցկացրել է վերականգնողական կենտրոնում, որտեղ կրկին սովորել է քայլել։
Բժիշկները նշում են, որ նեկրոտիկ ֆասցիիտը հազվադեպ, բայց չափազանց վտանգավոր վարակ է, որը պահանջում է անհապաղ բժշկական միջամտություն։
ՈՒՂԻՂ ԵԹԵՐ
Ամենադիտված 
Այնթափի դպրոցը սգում է աշակերտուհու մահը
