Պուտինը կատակել է, որ Յակուտիայում խարդախները չեն դիմանում ցրտին

Ռուսաստանի նախագահ Վլադիմիր Պուտինը Յակուտիայի ղեկավար Այսեն Նիկոլաևի հետ հանդիպման ժամանակ կատակել է, որ Յակուտիայում խարդախները չեն դիմանում ցրտին։ Այդ մասին հայտնում է ՌԻԱ Նովոստին։

Ընտանիքների աջակցության հարցը քննարկելիս Նիկոլաևը նշել է, որ ծրագրերին միացել է նաև տարածաշրջանի բիզնեսը։ Նրա խոսքով՝ մի շարք տեղական ընկերություններ երեխայի ծնվելու դեպքում իրենց աշխատակիցներին վճարում են մեկ միլիոն ռուբլի։

Նիկոլաևը հավելել է, որ Յակուտիայում «իրական բիզնես» է գործում, և «խարդախները չեն դիմանում»։ Ի պատասխան՝ Պուտինը կատակել է. «Ցուրտ է»։

Զրույցի ընթացքում Յակուտիայի ղեկավարը նաև վստահեցրել է, որ տարածաշրջանի իշխանությունները կշարունակեն գործադրել բոլոր ջանքերը ժողովրդագրական ծրագրի իրականացման համար։

Ավելի վաղ Պուտինը կատակով էր արձագանքել նաև Կամբոջայի վարչապետ Հուն Մանեթի հետ բանակցությունների ժամանակ թարգմանչի փոքր ուշացմանը՝ ենթադրելով, որ նա հոգնել է «Ռուսաստան–ԱՍԵԱՆ» գագաթնաժողովի աշխատանքներից։