Շիրակում շան պատճառով վիճաբանությունը վերածվել է ծեծկռտուքի․ կան տուժածներ և ձերբակալվածներ

Շիրակի մարզում շան հաչելու պատճառով ծագած վիճաբանությունը վերածվել է զանգվածային ծեծկռտուքի, որի հետևանքով կան տուժածներ։ Այս մասին հայտնում է ֆոտոլրագրող Գագիկ Շամշյանը։

Դեպքը տեղի է ունեցել հուլիսի 12-ին՝ ժամը 21:10-ի սահմաններում, Գյումրու Պարույր Սևակի փողոցում։ Տեղեկություն ստանալուց հետո դեպքի վայր են մեկնել ոստիկանության պարեկային և համայնքային ոստիկանության ծառայողները։

Իրավապահները խուլիգանություն կատարելու կասկածանքով ձերբակալել և ոստիկանության Մուշի բաժին են տեղափոխել հինգ անձի։

Նախնական տվյալներով՝ վիճաբանությունը սկսվել է շան հաչելու պատճառով՝ շան տիրոջ և 39-ամյա տղամարդու միջև, այնուհետև վերածվել է ծեծկռտուքի։ Միջադեպի հետևանքով մարմնական վնասվածքներ են ստացել երեք անձ։

Դեպքի առթիվ կազմված փաստաթղթերը փոխանցվել են ՀՀ քննչական կոմիտեի Շիրակի մարզային քննչական վարչություն՝ հետագա քննության համար։