Samsung-ի ամենաթանկ սմարթֆոնում հայտնաբերվել է էկրանի խնդիր

Samsung Galaxy S26 Ultra սմարթֆոնի որոշ օգտատերեր հայտնել են էկրանի վրա հայտնվող կարմիր բծերի մասին։ Այդ մասին գրում է հարավկորեական Newsway պարբերականը։

Խնդիրը նկատվել է հիմնականում Հարավային Կորեայում, որտեղ մի շարք օգտատերեր հայտնել են, որ սարքի էկրանի վերին հատվածում կարմրավուն բիծ է առաջացել։ Samsung-ը հաստատել է, որ տեղյակ է խնդրի մասին, սակայն դրա պատճառը դեռևս չի պարզել։

Մասնագետների կարծիքով՝ խնդիրը կարող է կապված լինել Privacy Display գործառույթի աշխատանքի հետ, որը նախատեսված է էկրանի որոշ հատվածների լուսավորությունը կառավարելու համար։ Չի բացառվում նաև, որ խոսքը OLED/AMOLED էկրաններին բնորոշ պիքսելների այրման (burn-in) խնդրի մասին է։

Օգտատերերի խոսքով՝ կարմիր բծերը չեն անհետանում նույնիսկ սարքը վերագործարկելու կամ անջատելուց հետո։

Samsung-ում հայտարարել են, որ արդեն սկսել են ներքին հետաքննություն՝ խնդրի պատճառը պարզելու համար։ Եթե պարզվի, որ այն պայմանավորված է գործարանային թերությամբ, ընկերությունը կարող է փոխարինել վնասված սարքերը կամ վերադարձնել դրանց գումարը։