Գիտնականները պարզել են, որ քրքումը կարող է պաշտպանել հոդերը քայքայումից

Քրքումի ակտիվ բաղադրիչը՝ կուրկումինը, վիտամին D-ի հետ համատեղ կարող է դանդաղեցնել հոդային աճառի քայքայումը օստեոարթրիտի դեպքում։ Հետազոտության արդյունքները հրապարակվել են Nutrients գիտական ամսագրում։

Գիտնականները փորձ են անցկացրել 30 առնետների վրա՝ նրանց մոտ մոդելավորելով ծնկահոդի օստեոարթրիտ։ 12 շաբաթվա ընթացքում կենդանիների մի մասին տվել են վիտամին D, մյուսներին՝ կուրկումին, երրորդ խմբին՝ երկուսի համադրությունը, իսկ վերահսկիչ խումբը բուժում չի ստացել։

Արդյունքները ցույց են տվել, որ թե՛ կուրկումինը, թե՛ վիտամին D-ն առանձին կիրառման դեպքում նվազեցրել են այտուցը, թեթևացրել ցավը և դանդաղեցրել աճառի վնասումը։ Սակայն ամենաարդյունավետը եղել է դրանց համատեղ կիրառումը․ աճառի հաստությունը գրեթե վերականգնվել է, իսկ վնասման աստիճանը շուրջ երեք անգամ նվազել է՝ համեմատած չբուժված խմբի հետ։

Բացի այդ, համակցված բուժումը նվազեցրել է բորբոքային գործընթացների հետ կապված նյութերի մակարդակը և ուժեղացրել օրգանիզմի բնական հակաօքսիդանտային պաշտպանությունը։

Հետազոտության հեղինակները նշում են, որ արդյունքները ստացվել են կենդանիների վրա կատարված փորձի ընթացքում, ուստի մարդկանց համար արդյունավետությունն ու անվտանգությունը հաստատելու նպատակով անհրաժեշտ են լրացուցիչ կլինիկական ուսումնասիրություններ։