Սևանի ափամերձ 2.5 հա տարածքը վերադարձվել է պետությանը․ Դատախազությունը բացահայտել է խախտումներ

Գլխավոր դատախազության ուսումնասիրությամբ պարզվել է, որ 2005 թվականին օրենքի խախտմամբ կազմակերպվել է «Սևան» ազգային պարկ» ՊՈԱԿ-ի տարածքում գտնվող 2.5 հա հողատարածքի վարձակալության մրցույթ, որի հաղթող է ճանաչվել Կոտայքի նախկին մարզպետ Կարապետ Գուլոյանը։

Դատախազության ներկայացրած առաջարկից հետո Գուլոյանի կամահայտնությամբ մինչև ժամկետի ավարտը դադարեցվել է վարձակալության պայմանագիրը։ 2026 թվականի հուլիսի 10-ին ուժը կորցրած է ճանաչվել նաև վարձակալության իրավունքի պետական գրանցումը, և Սևանի ափամերձ տարածքը վերադարձվել է պետությանը։

Ուսումնասիրությամբ պարզվել է նաև, որ 2021-2024 թվականների ընթացքում վարձավճարի փոփոխության վերաբերյալ սահմանված կարգով ծանուցումը չի իրականացվել ժամանակին, ինչի հետևանքով չի հաշվարկվել և չի վճարվել շուրջ 2 միլիոն 432 հազար դրամ վարձավճար։ Դեպքի առնչությամբ Դատախազությունը հանցանքի մասին հաղորդում է ներկայացրել։

Դատախազությունը հայտնում է, որ տվյալ տարածքում արձանագրվել են նաև այլ անձանց կողմից հողազավթման դեպքեր։ Իրավասու պետական մարմինների հետ համատեղ շարունակվում են աշխատանքները՝ տարածքն ապօրինի զբաղեցումից ազատելու ուղղությամբ։