6 և ավելի երեխա ունեցող ընտանիքներին բնակարան ձեռք բերելու համար աջակցություն կտրամադրվի

2027 թվականի մարտից Հայաստանի կառավարությունը 100 տոկոսով կսուբսիդավորի 6 և ավելի երեխա ունեցող ընտանիքների բնակարանների ձեռքբերումը։ Այս մասին հայտնել է ՀՀ աշխատանքի և սոցիալական հարցերի նախարարին կից հասարակական խորհրդի նիստում նախարարի խորհրդական Գայանե Կարագյոզյանը։

Ծրագիրը կգործի Հայաստանի բոլոր բնակավայրերում՝ բացառությամբ Երևանի։ Աջակցությունը նախատեսվում է բնակարան կամ տուն ձեռք բերելու նպատակով։

Ծրագրից օգտվելու համար ընտանիքի բոլոր անդամները պետք է լինեն ՀՀ քաղաքացիներ, իսկ տարեկան ընդհանուր եկամուտը չպետք է գերազանցի 10 մլն դրամը։ Եկամուտները կստուգվեն հարկային հայտարարագրերի հիման վրա։ Բացի այդ, ընտանիքը չպետք է ունենա 50 մլն դրամից ավելի ընդհանուր արժեքով անշարժ գույքի 50 և ավելի տոկոս բաժնեմաս։

Աջակցության չափը կախված կլինի երեխաների թվից․ յուրաքանչյուր անչափահաս երեխայի համար կտրամադրվի 4 մլն դրամ։ Եթե բնակարանը կամ տունը ձեռք բերվի գյուղական բնակավայրում, ընդհանուր աջակցության գումարին կավելանա ևս 4 մլն դրամ։