Սյունիքում իրականացված արևային էներգետիկայի ծրագիրը ներկայացվել է միջազգային հեղինակավոր գիտաժողովում

Սյունիքի մարզում Զանգեզուրի պղնձամոլիբդենային կոմբինատի (ԶՊՄԿ) աջակցությամբ իրականացված վերականգնվող էներգետիկայի ծրագիրը ներկայացվել է «Zero Carbon Built Environment» (ZCBE 2026) միջազգային գիտաժողովում՝ արժանանալով ոլորտի մասնագետների բարձր գնահատականին։

Ծրագրի շրջանակում Կապան համայնքի Սզնակ, Սյունիք, Դիցմայրի, Խորձոր և Բարգուշատ բնակավայրերում տեղադրվել են 273 արևային ֆոտովոլտային կայան և 227 արևային ջրատաքացուցիչ։ Արդյունքում հարյուրավոր ընտանիքներ անցել են վերականգնվող էներգիայի օգտագործման՝ նվազեցնելով վառելափայտից կախվածությունն ու կոմունալ ծախսերը, ինչպես նաև նպաստելով շրջակա միջավայրի պահպանությանը։

Ծրագրի տեխնիկական, տնտեսական և բնապահպանական արդյունքների վերլուծությունը գիտաժողովում ներկայացրել են ԶՊՄԿ ներկայացուցիչները՝ հիմնվելով իրական շահագործման տվյալների վրա։ Զեկույցը մեծ հետաքրքրություն է առաջացրել մասնագիտական շրջանակներում, իսկ հեղինակները հրավիրվել են միջազգային հարթակում ներկայացնելու ծրագրի փորձը։

Քննարկումների ընթացքում առաջարկ է հնչել ZCBE-ի հաջորդ գիտաժողովն անցկացնել Հայաստանում, ինչը հնարավորություն կտա մասնակիցներին տեղում ծանոթանալ Սյունիքում իրականացված ծրագրին։ Կազմակերպիչների գնահատմամբ՝ այս նախաձեռնությունը հաջողված օրինակ է, որը կարող է կիրառվել նաև այլ երկրներում։