Լուլա դա Սիլվա․ Բրազիլիան պետք է ամրապնդի իր պաշտպանական կարողությունները

Միջազգային հարաբերություններում աճող անկայունությունը Բրազիլիային ստիպում է ավելի մեծ ուշադրություն դարձնել պաշտպանության և սեփական ինքնիշխանության ապահովման հարցերին։ Այդ մասին հայտարարել է երկրի նախագահ Լուիս Ինասիու Լուլա դա Սիլվան՝ Սան Պաուլոյում Ավիացիայի և տիեզերքի ինստիտուտ կատարած այցի ընթացքում։

«Մենք պատերազմ չենք ցանկանում, սակայն ցանկանում ենք կառուցել մի երկիր, որը լիովին պատրաստ կլինի պաշտպանել իր ինքնիշխանությունը», — նշել է Բրազիլիայի նախագահը։

Լուլա դա Սիլվայի խոսքով՝ ազգային անվտանգության պաշտպանությունը չի սահմանափակվում միայն պետական սահմանների պահպանությամբ։ Այն պետք է ներառի նաև ռազմավարական նշանակության ռեսուրսների, այդ թվում՝ նավթի և օգտակար հանածոների պաշտպանությունը։ Նա հայտնել է, որ արդեն անցկացվել է առաջին հանդիպումը՝ երկրի պաշտպանական արդյունաբերության զարգացման հարցերի շուրջ։

Ավելի վաղ բրազիլացի պատգամավոր Ժուլիու Լոպեսը TASS-ին հայտնել էր, որ Բրազիլիան պետք է ընդլայնի պաշտպանական համագործակցությունը Ռուսաստանի հետ՝ ազգային անվտանգությունն ամրապնդելու նպատակով։ Նրա գնահատմամբ՝ համագործակցության առավել հեռանկարային ուղղություններից են տանկերի և հրթիռների արտադրության տեխնոլոգիաները։ Այս մասին հայտնում է TASS-ը: