Ղազախստանում թղթադրամները «լվանում են» լվացքի մեքենայում՝ որակը ստուգելու համար

Ղազախստանի ազգային բանկը ներկայացրել է, թե ինչ փորձարկումներ են անցնում նոր թղթադրամները՝ շրջանառության մեջ մտնելուց առաջ։ Դրանցից մեկը բավական անսովոր է՝ թղթադրամները լվանում են լվացքի մեքենայում․ հայտնում է Sputnik Արմենիան։

Ղազախստանում թողարկվում են 500, 1000, 2000, 5000, 10 000 և 20 000 թենգե անվանական արժեքով թղթադրամներ, որոնց արտադրությունն իրականացվում է Ալմաթիի թղթադրամների գործարանում։

Փորձարկումների ընթացքում մասնագետները նմանակում են առօրյա իրավիճակներ․ օրինակ՝ երբ թղթադրամը մնում է հագուստի գրպանում և հայտնվում լվացքի մեքենայում։ Դրա համար դրանք ենթարկվում են ջրի, լվացող միջոցների, մեխանիկական ազդեցության և ջերմաստիճանի փոփոխությունների։

Բացի այդ, ստուգվում է թղթադրամների դիմադրությունը բազմակի ծալումների, մաշվածության և երկարատև օգտագործման հետևանքով առաջացող այլ ազդեցությունների նկատմամբ։ Մասնագետները կիրառում են հատուկ սարքավորումներ, որոնք նմանակում են կանխիկի շրջանառության պայմանները։

Ազգային բանկում նշել են, որ նման փորձարկումները թույլ են տալիս կատարելագործել թղթադրամների արտադրության տեխնոլոգիաները և ապահովել, որ դրանք երկար ժամանակ պահպանեն իրենց տեսքը, պաշտպանիչ հատկանիշներն ու ամրությունը։