ՀԱՊԿ-ը ներկայացրել է ահաբեկչության և զենքի ապօրինի շրջանառության դեմ պայքարի արդյունքները

Մոսկվայում անցկացվել է «Կենտրոնական Ասիայում ահաբեկիչներին զենքի մատակարարումների կանխարգելման կարողությունների ամրապնդում» թեմայով բարձր մակարդակի տարածաշրջանային հանդիպում, որը կազմակերպվել է ՄԱԿ-ի Հակաահաբեկչական վարչության կողմից՝ ռուսական կողմի մասնակցությամբ։

Միջոցառմանը մասնակցել են ՀԱՊԿ գլխավոր քարտուղարի տեղակալի պաշտոնակատար Վալերի Սեմերիկովը, ԱՊՀ Հակաահաբեկչական կենտրոնի ղեկավար Եվգենի Սիսոևը, ՇՀԿ Տարածաշրջանային հակաահաբեկչական կառույցի գործադիր կոմիտեի տնօրենի տեղակալ Արթուր Գոլովանովը, ինչպես նաև Ղազախստանի, Ղրղզստանի, Տաջիկստանի, Թուրքմենստանի և Ուզբեկստանի հակաահաբեկչական կառույցների ղեկավարները։

Իր ելույթում Վալերի Սեմերիկովը ներկայացրել է ՀԱՊԿ-ի ամենամյա «Վարձկան», «Ալիք», «Անօրինական» և «Պրոքսի» օպերատիվ-կանխարգելիչ գործողությունների արդյունքները։ Նրա խոսքով՝ այդ գործողությունների շրջանակում, բացի հիմնական խնդիրներից, իրականացվում է նաև զենքի և պայթուցիկ նյութերի ապօրինի շրջանառության դեմ համակարգված պայքար։

Վերջին հինգ տարիների ընթացքում այդ գործողությունների արդյունքում ապօրինի շրջանառությունից առգրավվել է 8374 միավոր հրազեն, ավելի քան 59 հազար զինամթերք և շուրջ 2 տոննա պայթուցիկ նյութ։ Հարուցվել է 296 քրեական գործ, կանխվել է 46 ահաբեկչական հարձակում, կասեցվել է 307 ահաբեկչական խմբավորման գործունեություն, իսկ առգրավված թմրամիջոցների ընդհանուր ծավալը գերազանցել է 437 տոննան։

Սեմերիկովը նշել է, որ հատուկ գործողությունների արդյունավետությունը բարձրացել է կազմակերպության ներքին բարեփոխումների և ԱՊՀ-ի, ՇՀԿ-ի ու ՄԱԿ-ի համապատասխան կառույցների հետ ավելի սերտ համագործակցության շնորհիվ։

Խոսելով հետագա քայլերի մասին՝ նա հայտնել է, որ ՀԱՊԿ Հավաքական անվտանգության խորհուրդը հաստատել է 2026–2030 թվականների հակաահաբեկչական և հակաթմրամիջոցային ռազմավարությունները, ինչպես նաև կազմակերպության հավաքական ուժերի կատարելագործման ծրագիրը։

Նրա խոսքով՝ շարունակվում է նաև Տաջիկստանի և Աֆղանստանի սահմանի ամրապնդման միջպետական նպատակային ծրագիրը, որը պետք է նպաստի տարածաշրջանում լարվածության նվազեցմանը։

«Միջազգային ահաբեկչության և զենքի ապօրինի շրջանառության դեմ պայքարում գործողությունների համակարգումն ուժեղացնելու նպատակով մենք մտադիր ենք էլ ավելի սերտ համագործակցել ԱՊՀ-ի, ՇՀԿ-ի և ՄԱԿ-ի հետ՝ գործող պայմանավորվածությունների շրջանակում։ Այդ համատեքստում հունիսի 28-ին Մոսկվայում անցկացված Անվտանգության միջազգային ֆորումի ընթացքում ստորագրել ենք համագործակցության շրջանակային փաստաթուղթ Աֆրիկյան միության Հակաահաբեկչական կենտրոնի հետ»,– նշել է Սեմերիկովը։

Հանդիպման մասնակիցները նաև քննարկել են ահաբեկչական նպատակներով հրաձգային զենքի, ինքնաշեն պայթուցիկ սարքերի և անօդաչու թռչող սարքերի կիրառման դեմ պայքարի լավագույն փորձը։