Ասիայի ամենաթանկ ընկերությունը ևս 100 միլիարդ դոլար կներդնի ԱՄՆ-ի տնտեսությունում

Թայվանական Taiwan Semiconductor Manufacturing Company (TSMC)-ն հայտարարել է, որ լրացուցիչ 100 միլիարդ դոլար կներդնի ԱՄՆ-ում կիսահաղորդիչների արտադրության ընդլայնման համար։ Այդ մասին հայտնում է Bloomberg-ը։

Այս որոշմամբ ընկերության ներդրումային ծրագրի ընդհանուր ծավալը կհասնի 265 միլիարդ դոլարի։ Լրացուցիչ միջոցներով նախատեսվում է կառուցել չորս նոր միկրոչիպերի գործարան, ինչի արդյունքում TSMC-ի արտադրական համալիրների թիվը ԱՄՆ-ում կհասնի 10-ի։

Հրապարակման համաձայն՝ ներդրումները ԱՄՆ-ի և Թայվանի միջև ձեռք բերված պայմանավորվածության մի մասն են, որի նպատակն է կիսահաղորդիչների արտադրությունը տեղափոխել Միացյալ Նահանգներ։ Փոխարենը Վաշինգտոնը թայվանական ապրանքների նկատմամբ մաքսատուրքերը նվազեցրել է մինչև 15 տոկոս, իսկ Թայվանը պարտավորվել է զգալի ներդրումներ կատարել ամերիկյան տնտեսությունում։

Միաժամանակ TSMC-ն հայտնել է, որ 2026 թվականի երկրորդ եռամսյակում ընկերության հասույթն աճել է 36 տոկոսով՝ նախորդ տարվա նույն ժամանակահատվածի համեմատ։ Ընկերությունում աճը կապում են արհեստական բանականության տեխնոլոգիաների նկատմամբ պահանջարկի կտրուկ աճի հետ։