Bloomberg․ Փորձագետները նախազգուշացնում են՝ արհեստական բանականությունը կարող է լուրջ հարված հասցնել աշխատաշուկային

Արհեստական բանականության (AI) արագ զարգացումը կարող է արմատապես փոխել համաշխարհային տնտեսությունը՝ առաջացնելով աշխատաշուկայի լուրջ ցնցումներ և հարկային համակարգի խնդիրներ։ Այս մասին գրում է Bloomberg-ը՝ հղում անելով ֆինանսների և տեխնոլոգիաների ոլորտի տասնյակ փորձագետների կարծիքներին։

Փորձագետների գնահատմամբ՝ ամենամեծ վտանգը ոչ թե «խելացի մեքենաների ապստամբությունն» է, այլ այն, որ AI-ը կարող է զանգվածաբար փոխարինել մարդկանց, հատկապես գրասենյակային աշխատողներին։ Արդյունքում պետությունները կարող են բախվել միաժամանակ երկու խնդրի՝ հարկային եկամուտների նվազման և գործազրկության նպաստների ու վերապատրաստման ծախսերի աճի։

Bloomberg-ը նշում է, որ նման իրավիճակը հիշեցնում է այսպես կոչված «Էնգելսի դադարը» (Engels' Pause)՝ Արդյունաբերական հեղափոխության ժամանակաշրջանը, երբ աշխատանքի արտադրողականությունը կտրուկ աճում էր, սակայն աշխատավարձերն ու մարդկանց կենսամակարդակը երկար տարիներ գրեթե չէին բարելավվում։

Շվեդիայի նախկին ֆինանսների նախարար Անդերս Բորգի խոսքով՝ արհեստական բանականությունը կարող է ապահովել արտադրողականության աննախադեպ աճ, սակայն դրա հետևանքով հնարավոր են նաև արագ քաղաքական և սոցիալական փոփոխություններ, եթե հասարակություններն ու կառավարությունները չկարողանան ժամանակին հարմարվել նոր իրողություններին։

Միևնույն ժամանակ, SuperJob-ի տվյալներով, Ռուսաստանում աճում է այն մարդկանց թիվը, որոնք անհանգստացած են AI-ի ազդեցությամբ աշխատաշուկայի վրա։ Եթե մեկ տարի առաջ հարցվածների 55 տոկոսը չէր վախենում արհեստական բանականությունից, ապա այժմ այդ ցուցանիշը նվազել է մինչև 49 տոկոս։