Սախալինում արջուկների «մենամարտը» հայտնվել է տեսախցիկում

Սախալինի մարզում ճանապարհի մոտ միմյանց հետ «մենամարտող» երկու արջուկներ հայտնվել են ոչ միայն տեղի բնակիչների, այլև Ռուսաստանի ՆԳՆ պաշտոնական ներկայացուցիչ Իրինա Վոլկի ուշադրության կենտրոնում։ Նա իր Telegram-ալիքում հրապարակել է վայրի կենդանիների մասնակցությամբ տեսանյութը։

Կադրերում երևում է, թե ինչպես են արջուկները սկզբում հրում միմյանց, ապա կանգնում հետևի թաթերի վրա և սկսում ուժերը չափել։ Մենամարտի ընթացքում նրանցից մեկը ընկնում է գետնին, իսկ մյուսը փորձում է կծել նրան, սակայն քիչ անց ընկած արջուկը հետ է մղում մրցակցին և շարունակում պայքարը։

Տեսանյութում նաև երևում է, թե ինչպես է արջուկներից մեկը մոտենում մարդկանց ավտոմեքենային՝ սպասելով, որ իրեն կկերակրեն։

Իրինա Վոլկի խոսքով՝ կենդանիները գրեթե մեկ ամիս գտնվել են ճանապարհի հարևանությամբ՝ վտանգ ստեղծելով ինչպես իրենց, այնպես էլ վարորդների համար։ Այդ պատճառով որոշում է կայացվել նրանց բռնել և տեղափոխել անվտանգ անտառային տարածք։

Գործողությանը մասնակցել են ճանապարհային ոստիկանության, անտառային և որսորդական ծառայությունների, անտառտնտեսության և կենդանաբանական այգու մասնագետները։

Տեսանյութի վերջում անօդաչու թռչող սարքով նկարահանված կադրերում երևում է, թե ինչպես են արջուկները դուրս գալիս վանդակներից և վազում դեպի անտառ։ Ըստ Իրինա Վոլկի՝ այժմ նրանք կրկին գտնվում են իրենց բնական միջավայրում և այլևս վտանգի տակ չեն։