Հանրային հեռուստաընկերության նոր տաղավարի կառուցման համար կառավարությունը լրացուցիչ գումար կհատկացնի

Կառավարությունը որոշում է ընդունել Հայաստանի Հանրային հեռուստաընկերության նոր՝ 8-րդ տաղավարի կառուցման համար լրացուցիչ ֆինանսական միջոցներ հատկացնելու վերաբերյալ։  ֆինանսավորումը կիրականացվի «Հայաստանի Հանրապետության կառավարության և Չինաստանի Ժողովրդական Հանրապետության կառավարության միջև տեխնիկատնտեսական համագործակցության մասին» համաձայնագրի շրջանակում։

Որոշման համաձայն՝ ՀՀ կառավարության պահուստային ֆոնդից Հանրային հեռարձակողի խորհրդին կհատկացվի 27 միլիոն 756 հազար դրամ (75 հազար ԱՄՆ դոլարին համարժեք գումար)։ Այդ միջոցները նախատեսված են չինական կողմի հարկային պարտավորությունների, պարտադիր վճարների և ծրագրի իրականացման ընթացքում առաջացած այլ ծախսերի փոխհատուցման համար։

Լրացուցիչ ֆինանսավորումը նպատակ ունի ապահովել Հանրային հեռուստաընկերության նոր՝ 8-րդ տաղավարի կառուցման աշխատանքների շարունակական իրականացումը՝ հայ-չինական տեխնիկատնտեսական համագործակցության շրջանակում։