Հայաստանը քննարկում է թարմ բանջարեղենի և ծաղիկների արտահանումը ԱՄԷ շուկա

ՀՀ էկոնոմիկայի նախարարի տեղակալ Արման Խոջոյանը հանդիպել է Արաբական Միացյալ Էմիրությունների գործարար պատվիրակության հետ՝ քննարկելու հայկական արտադրանքի արտահանման հնարավորությունները։

Հանդիպման ընթացքում կողմերը քննարկել են Հայաստանից ԱՄԷ թարմ բանջարեղենի և ծաղիկների արտահանման, լոգիստիկ երթուղիների, մատակարարման կազմակերպման և ֆիտոսանիտարական պահանջների հետ կապված հարցեր։

Արման Խոջոյանը ներկայացրել է Հայաստանի ջերմատնային տնտեսությունների ներուժը, տեղական արտադրանքի տեսականին ու որակական առավելությունները՝ ընդգծելով Ծոցի երկրների հետ համագործակցության ընդլայնման կարևորությունը։ Նա նաև առաջարկել է դիտարկել հայկական հանքային ջրի արտահանման հնարավորությունը։

Հուլիսի 17-ին պատվիրակության անդամները այցելել են մի շարք ջերմատնային տնտեսություններ՝ ծանոթանալու արտադրական գործընթացներին, փաթեթավորման, սառնարանային պահպանման և լոգիստիկ հնարավորություններին։

Կողմերը պայմանավորվել են շարունակել համագործակցությունը և մշակել գործնական քայլեր՝ Հայաստանի ու ԱՄԷ-ի միջև առևտրատնտեսական կապերի զարգացման ուղղությամբ։