Կեղծ «հնդիկ վանականները» զբոսաշրջիկներից գումար են շորթել՝ «թուղթ ու գիրը հանելու» պատրվակով

Թաիլանդի Պատայա քաղաքում զբոսաշրջիկները բողոքել են վանականի հագուստով ներկայացող հնդիկ տղամարդկանցից, որոնք փողոցներում մարդկանցից գումար էին պահանջում՝ «թուղթ ու գիրը հանելու» անվան տակ։ Դեպքի մասին հայտնում է The Pattaya News-ը։

Ըստ հրապարակման՝ կասկածյալները կանգնեցնում էին զբոսաշրջիկներին, գուշակում էին նրանց ափով կամ դեմքի գծերով և դրա համար պահանջում 199 բատ։ Այնուհետև հայտարարում էին, թե մարդուն շուտով դժբախտություն է սպասվում, և «ազատվելու» համար պահանջում էին ևս 1900 բատ։ Մերժման դեպքում նրանք, ըստ հաղորդումների, ագրեսիվ վարք էին դրսևորում և շարունակում էին հետապնդել զբոսաշրջիկներին մինչև գումար ստանալը։

Հուլիսի 16-ին Պատայայի զբոսաշրջային ոստիկանությունը ռեստորաններից մեկում ձերբակալել է 36-ամյա կասկածյալներից մեկին։ Նա խոստովանել է խարդախությունը և մեղադրվում է նաև առանց համապատասխան թույլտվության աշխատելու մեջ։ Մյուս կասկածյալների որոնումները շարունակվում են։