Apple-ը շուկայական արժեքով շրջանցել է Nvidia-ին և դարձել աշխարհի առաջատար ընկերությունը

Apple-ը կրկին զբաղեցրել է աշխարհի ամենաթանկարժեք ընկերության դիրքը՝ շուկայական արժեքով առաջ անցնելով Nvidia-ից։ Reuters-ի փոխանցմամբ՝ Apple-ի կապիտալիզացիան հասել է մոտ 4,88 տրիլիոն դոլարի, մինչդեռ Nvidia-ի արժեքը նվազել է մինչև 4,86 տրիլիոն դոլար՝ բաժնետոմսերի 3,5 տոկոսի անկումից հետո։

Վերլուծաբանների գնահատմամբ՝ ներդրողները վերանայում են արհեստական բանականության ոլորտի հեռանկարները և այլևս կենտրոնացած չեն միայն AI չիպեր արտադրող ընկերությունների վրա։ Նրանց կարծիքով՝ Apple-ը կարող է ավելի արդյունավետ դրամայնացնել արհեստական բանականությունը՝ ծառայությունների, սեփական էկոհամակարգի և նոր սարքերի վաճառքի միջոցով։

Apple-ը վերջին ամիսներին ակտիվացրել է AI ռազմավարությունը՝ ներկայացնելով Siri-ի թարմացված տարբերակը և զարգացնելով արհեստական բանականության հնարավորությունները։ Միաժամանակ փորձագետները նշում են, որ Nvidia-ն շարունակում է մնալ AI ոլորտի առանցքային խաղացողներից մեկը և շուկայի տրամադրությունների փոփոխության դեպքում կարող է կրկին վերադառնալ առաջին հորիզոնական։