Թեհրանը խզեց պայմանավորվածությունը Վաշինգտոնի հետ․ Իրանը դադարեցրել է հուշագրի կատարումը

Թեհրանը դադարեցրել է ԱՄՆ-ի հետ հակամարտության դադարեցման վերաբերյալ հուշագրով ստանձնած պարտավորությունների կատարումը, հայտարարել է Իրանի փոխարտգործնախարար Կազեմ Ղարիբ-Աբադին։

Նրա խոսքով՝ Իրանը այլևս չի իրականացնում փաստաթղթով նախատեսված իր պարտավորությունները, քանի որ Վաշինգտոնը չի կատարել ձեռք բերված պայմանավորվածությունները։

«Մենք նույնպես դադարեցրել ենք մեր պարտավորությունների կատարումը և այժմ դրանք չենք իրականացնում՝ կենտրոնանալով ազգային պաշտպանության խնդիրների վրա»,– ասել է Ղարիբ-Աբադին՝ հավելելով, որ իրավիճակը կապված է ԱՄՆ-ի գործողությունների հետ։ Նրա խոսքերը փոխանցել է «Թասնիմ» գործակալությունը։

Ավելի վաղ՝ հուլիսի 15-ին, Իրանի խորհրդարանի խոսնակ, ինչպես նաև ԱՄՆ-ի հետ բանակցային թիմի ղեկավար Մոհամմադ Բաղեր Ղալիբաֆը հայտարարել էր, որ Թեհրանը չի տեսնում հուշագիրը պահպանելու իմաստը, եթե դրա դրույթները չեն իրականացվում։

Թեհրանի և Վաշինգտոնի միջև համապատասխան հուշագիրը ստորագրվել էր հունիսի 18-ի գիշերը։ Փաստաթուղթը նախատեսում էր փետրվարի 28-ին սկսված հակամարտության դադարեցում։

Սակայն Իրանի իշխանությունների պնդմամբ՝ հուլիսի 8-ից հետո ԱՄՆ զինված ուժերը մի շարք հարվածներ են հասցրել Իրանի տարածքին։ Վաշինգտոնը հայտարարել է, որ այդ գործողությունները եղել են պատասխան՝ կապված Հորմուզի նեղուցում առևտրային նավերի դեմ Իրանի գործողությունների հետ։