ՆԱՏՕ-ի հետախուզական ինքնաթիռը կրկին թռիչք է իրականացրել Սև ծովի երկնքում

ՆԱՏՕ-ի Bombardier Challenger 650 Artemis II հետախուզական ինքնաթիռը հերթական անգամ թռիչք է իրականացրել Սև ծովի չեզոք ջրերի վերևում։ Այս մասին հայտնում է ՏԱՍՍ գործակալությունը՝ հղում անելով Եվրոպական միության ավիադիսպետչերական ծառայությունների իր աղբյուրին։

Աղբյուրի փոխանցմամբ՝ ինքնաթիռը թռել է Սև ծովի հարավային հատվածում՝ արևմուտքից դեպի արևելք և հակառակ ուղղությամբ՝ մնալով չեզոք ջրերի օդային տարածքում և չմտնելով որևէ երկրի օդային սահմաններ։ Նշվում է, որ այն օդ է բարձրացել Ռումինիայի Կոնստանցա քաղաքում տեղակայված ռազմական ավիաբազայից, այնուհետև անցել Ռումինիայի և Բուլղարիայի ավիադիսպետչերական պատասխանատվության գոտիներով ու հասել Սև ծովի միջազգային օդային տարածք։

Ըստ նույն աղբյուրի՝ Bombardier Challenger 650 Artemis II-ը թռիչքն իրականացրել է ավելի քան 9,7 կիլոմետր բարձրության վրա և շարժվել քաղաքացիական ավիացիայի համար նախատեսված օդային երթուղիներից դուրս։ Հիշեցնենք, որ նույն ինքնաթիռի նախորդ հետախուզական առաքելության մասին հաղորդվել էր հուլիսի 18-ին, երբ այն Սև ծովի երկնքում գտնվել էր շուրջ 40 րոպե։