Թուրքիան կրճատել է Ռուսաստանից բնական գազի ներմուծումը

Թուրքիան 2026 թվականի առաջին հինգ ամիսներին Ռուսաստանից ներմուծել է ընդհանուր 9,6 միլիարդ խորանարդ մետր բնական գազ՝ «Թուրքական հոսք» և «Կապույտ հոսք» գազատարներով։ Այս մասին վկայում են Թուրքիայի էներգետիկ շուկայի կարգավորման վարչության (EPDK) հրապարակած տվյալները։

Տվյալների համաձայն՝ 2025 թվականի նույն ժամանակահատվածի համեմատ ռուսական գազի մատակարարումները նվազել են 4,1 տոկոսով։ Միայն մայիս ամսին Թուրքիան Ռուսաստանից ներմուծել է 1,27 միլիարդ խորանարդ մետր բնական գազ։

Միևնույն ժամանակ, Bloomberg-ի տեղեկություններով, Անկարան և Մոսկվան բանակցություններ են վարում 2026 թվականից հետո բնական գազի մատակարարման պայմանագրերի երկարաձգման շուրջ։ Սակայն հնարավոր մատակարարումների ծավալներն ու պայմանագրերի ժամկետները դեռ վերջնականապես համաձայնեցված չեն։ Ավելի վաղ հաղորդվել էր նաև, որ 2026 թվականի հունվար-ապրիլ ամիսներին Ռուսաստանից Թուրքիա գազի մատակարարումները տարեկան կտրվածքով նվազել էին 22,8 տոկոսով։