NYT․ Պենտագոնը չի հրապարակել Իրանի հարվածների հետևանքով տուժած ամերիկացի զինծառայողների մասին ամբողջական տվյալները

The New York Times-ը, հղում անելով ամերիկացի պաշտոնյաներին, հայտնում է, որ Պենտագոնը չի հրապարակել Հորդանանում տեղակայված ամերիկյան զորքերի դեմ Իրանի իրականացրած երեք հարվածների մասին ամբողջական տեղեկությունները։ Ըստ պարբերականի՝ այդ հարձակումները նախորդել են ուրբաթ օրը տեղի ունեցած հարձակմանը, որի հետևանքով զոհվել է ԱՄՆ-ի երկու զինծառայող, իսկ ևս մեկը համարվում է անհետ կորած։

Աղբյուրների փոխանցմամբ՝ ավելի վաղ իրականացված հարվածների հետևանքով տուժել են տասնյակ ամերիկացի զինծառայողներ, վնասվել են նաև մի քանի ուղղաթիռներ։ Սակայն Պենտագոնը չի հրապարակել տվյալներ այդ հարձակումների, տուժածների և հասցված վնասի վերաբերյալ։ Նշվում է, որ ԱՄՆ Կենտրոնական հրամանատարությունն իր պաշտոնական հաղորդագրություններում հիմնականում անդրադարձել է Հորմուզի նեղուցում առևտրային նավերի դեմ իրականացված հարձակումներին՝ չնշելով տարածաշրջանում ամերիկյան ռազմաբազաների գնդակոծությունները։

Ամերիկացի պաշտոնյաների խոսքով՝ նման մոտեցումը պայմանավորված է եղել օպերատիվ անվտանգության նկատառումներով, որպեսզի Իրանը չկարողանա գնահատել իր թիրախների տեղակայումը։ The New York Times-ի տվյալներով՝ հակամարտության սկզբից՝ փետրվարի 28-ից, զոհվել է 17 ամերիկացի զինծառայող, ավելի քան 400-ը վիրավորվել են, սակայն վերջին շաբաթներին Պենտագոնը դադարել է հրապարակել ընդհանուր վիճակագրությունը։ Ավելի վաղ Իրանի արտաքին գործերի նախարարության պաշտոնական ներկայացուցիչ Իսմայիլ Բաղային հայտարարել էր, որ Թեհրանը ԱՄՆ-ից ստացել է հրադադարի վերաբերյալ առաջարկներ, իսկ միջնորդները շարունակում են աշխատել Վաշինգտոնի և Թեհրանի միջև լարվածության նվազեցման ուղղությամբ։