Al Jazeera․ ինչու է Իրանը հարվածում Պարսից ծոցի երկրներին՝ խուսափելով ԱՄՆ-ի ռազմածովային ուժերից

Իրանը շարունակում է հարվածներ հասցնել Պարսից ծոցի երկրների ռազմական և քաղաքացիական ենթակառուցվածքներին՝ միաժամանակ խուսափելով ԱՄՆ-ի ռազմածովային ուժերի և Իսրայելի ուղղությամբ ուղղակի հարձակումներից։ Al Jazeera-ի փոխանցմամբ՝ մի շարք վերլուծաբաններ կարծում են, որ Թեհրանը նման մարտավարությամբ փորձում է ճնշում գործադրել Վաշինգտոնի վրա՝ առանց հակամարտությունը լայնածավալ պատերազմի վերածելու։

Լիբանանցի ռազմական վերլուծաբան Էլիաս Հաննայի խոսքով՝ ԱՄՆ-ի ռազմածովային ուժերին հարվածելը կարող է հանգեցնել Վաշինգտոնի կոշտ պատասխանին, իսկ տեխնիկական առումով նման թիրախները լավ պաշտպանված են և հագեցած ժամանակակից հակաօդային պաշտպանության համակարգերով։ Միաժամանակ Թեհրանի համալսարանի քաղաքական գիտությունների պրոֆեսոր Աթիֆե Թաղիանին պնդում է, որ ԱՄՆ-ն օգտագործում է Պարսից ծոցի երկրները, մասնավորապես Քուվեյթը, Իրանի քաղաքացիական ենթակառուցվածքների դեմ գործողություններ իրականացնելու համար, ինչն, ըստ նրա, միջազգային իրավունքի տեսանկյունից Թեհրանին պատասխան քայլերի իրավունք է տալիս։

Մյուս կողմից, Քուվեյթի համալսարանի պրոֆեսոր Աբդուլլահ ալ-Շայջին այդ պնդումները որակել է «իրանական քարոզչություն»՝ ընդգծելով, որ ԱՄՆ-ի հարվածները հիմնականում իրականացվում են Իրանի ափերի մոտ տեղակայված ավիակիրներից, այլ ոչ թե Պարսից ծոցի երկրների տարածքներից։ Նրա գնահատմամբ՝ Իրանը խուսափում է ԱՄՆ-ի ռազմածովային ուժերին հարվածելուց, քանի որ նույնիսկ մեկ ամերիկացի զինծառայողի զոհվելու դեպքում կարող է բախվել ծանր ռազմական պատասխանին։ Վերլուծաբանների կարծիքով՝ թե՛ Վաշինգտոնը, թե՛ Թեհրանը շարունակում են ընտրովի թիրախներ ընտրել՝ փորձելով չհասցնել իրավիճակը լիարժեք տարածաշրջանային պատերազմի։