ԱԱԾ-ում ևս կարող է ներդրվել «Պատիվ ունեմ» ծրագիրը

Հայաստանում առաջարկվում է «Պատիվ ունեմ» ծրագիրը ներդնել նաև Ազգային անվտանգության ծառայությունում՝ հնարավորություն տալով բուհերի ուսանողներին ուսումնառության ընթացքում անցնել զինվորական պատրաստություն, իսկ ավարտից հետո ծառայել ԱԱԾ-ում։ Օրենսդրական փաթեթով նախատեսվում է փոփոխություններ կատարել զինվորական ծառայությանը, Սահմանապահ զորքերին և ազգային անվտանգության մարմիններին վերաբերող մի շարք օրենքներում։

Ծրագրի մասնակիցները պայմանագիր կկնքեն՝ ուսման ընթացքում զինվորական պատրաստություն անցնելու և ավարտից հետո ԱԱԾ-ի սահմանած վայրում ու պայմաններով ծառայություն իրականացնելու վերաբերյալ։ Նրանք նախ կզորակոչվեն պարտադիր զինվորական ծառայության, կծառայեն ՊՆ ստորաբաժանումներում որպես շարքային կազմի զինծառայողներ, ապա կտեղափոխվեն ԱԱԾ և կնշանակվեն սպայական պաշտոնների։

Նախագծի համաձայն՝ նոր մեխանիզմը կնպաստի ԱԱԾ-ի, մասնավորապես՝ Սահմանապահ զորքերի համալրմանը բարձրագույն կրթություն ունեցող զինծառայողներով։ Փաթեթով նաև առաջարկվում է հստակեցնել ԱԱԾ աշխատակիցների կողմից զենքի, հատուկ միջոցների և ֆիզիկական ուժի կիրառման դեպքերը, բարձրացնել ավագ սպայական կազմի ծառայության սահմանային տարիքը 52-ից մինչև 55 տարի և ընդլայնել ծառայողների սոցիալական երաշխիքները։

«Պատիվ ունեմ» ծրագրի գաղափարախոսությունն է բուհական տարկետումը կապել ապագա սպայական ծառայության հետ։ Մասնակիցներին տրամադրվում է տարկետում, ուսման վարձը փոխհատուցվում է պետության կողմից, իսկ ուսումնառությունն ու զինվորական պատրաստությունն ավարտելուց հետո նրանց շնորհվում է լեյտենանտի կոչում և կնքվում է կրտսեր սպայական ծառայության պայմանագիր։