Գիտնականները զգուշացնում են․ առաջիկա ժամերին Երկիրը կբախվի մագնիսական փոթորկի

Ռուսաստանի գիտությունների ակադեմիայի Տիեզերական հետազոտությունների ինստիտուտի (ԻԿԻ ՌԳԱ) Արեգակնային աստղագիտության լաբորատորիայի մասնագետները հայտնել են, որ առաջիկա ժամերին Երկրի վրա կարող է սկսվել մագնիսական փոթորիկ։ Այս մասին տեղեկացվում է լաբորատորիայի Telegram-ալիքում։

Գիտնականների տվյալներով՝ արդեն արձանագրվել է Արեգակից եկող արևային քամու արագության և խտության աստիճանական աճ, ինչը վկայում է գեոմագնիսական ակտիվության բարձրացման մասին։ Մասնագետների գնահատմամբ՝ օրվա ընթացքում այդ ցուցանիշները կշարունակեն աճել, սակայն իրավիճակը կարող է փոփոխվել՝ կախված տիեզերական եղանակի զարգացումներից։

Ավելի վաղ ԻԿԻ ՌԳԱ-ի մասնագետները հայտնել էին, որ սպասվում է G1-G2 մակարդակի (թույլ և միջին ուժգնության) մագնիսական փոթորիկ։ G3 և ավելի բարձր ուժգնության փոթորկի հավանականությունը գնահատվում է մոտ 5 տոկոս։ Գիտնականների խոսքով՝ Երկրին է մոտենում Արեգակի պսակային խոռոչից արտանետված արագ արևային քամու հոսքը, որը կհասնի մոլորակին հուլիսի 22-ին։