Թաիլանդում փողոցային սնունդից հետո զբոսաշրջիկի սիրտը կանգ է առել

Մոսկվայից ժամանած զբոսաշրջիկը ծանր վիճակում է հայտնվել Թաիլանդի Պատտայայում փողոցային սնունդ օգտագործելուց հետո։ Այս մասին հայտնում է Mash Telegram-ալիքը։

Աղբյուրի տեղեկություններով՝ Դմիտրի անունով տղամարդը կնոջ հետ Walking Street զբոսաշրջային փողոցում պատվիրել է գրիլի վրա պատրաստված կծու հավի թևիկներ։ Մի քանի ժամ անց նրա մոտ ի հայտ են եկել փորլուծություն, սրտխառնոց և ցնցումներ։ Սկզբում նա փորձել է ինքնուրույն բուժվել ճանապարհային դեղատուփի դեղամիջոցներով, սակայն վիճակը շարունակել է վատթարանալ։

Դրանից հետո նրան տեղափոխել են Thai International Hospital, որտեղ նրա վիճակը կտրուկ վատացել է, և սիրտը կանգ է առել։ Բժիշկներին հաջողվել է շուրջ մեկ ժամ տևած վերակենդանացման միջոցառումներից հետո վերականգնել նրա սրտի աշխատանքը։ Նա երկար ժամանակ գտնվել է արհեստական շնչառության սարքի վրա։ Ներկայումս տղամարդը գիտակցության է եկել և շնչում է ինքնուրույն, սակայն ունի կարճաժամկետ հիշողության խնդիրներ։ Բժիշկների տվյալներով՝ ՄՌՏ հետազոտությունը գլխուղեղի վնասվածքներ չի հայտնաբերել։ Այժմ նրա հայրենադարձումը հնարավոր է միայն բժիշկների ուղեկցությամբ, ինչով զբաղվում է ապահովագրական ընկերությունը։