Մերցը Ալիևի հետ քննարկել է գազի և նավթի մատակարարումները

Գերմանիայի կանցլեր Ֆրիդրիխ Մերցը հայտարարել է, որ Ադրբեջանի նախագահ Իլհամ Ալիևի հետ քննարկել է նավթի և բնական գազի մատակարարման հարցը։

«Մենք լրջորեն հանձնառու ենք Գերմանիայի և Ադրբեջանի միջև հարաբերությունների ընդլայնմանը։ Հարավային գազային միջանցքի միջոցով նավթի և բնական գազի մատակարարման հարցում համագործակցությունը հատկապես կարևոր է՝ հաշվի առնելով Մերձավոր Արևելքում շարունակվող ճգնաժամը։ Մենք մանրամասն քննարկել ենք սա։ Մենք ցանկանում ենք Ադրբեջանի հետ ավելի դիվերսիֆիկացնել մեր էներգետիկ մատակարարումները», - ասել է Մերցը Ալիևի հետ բանակցություններից հետո Բեռլինում կայացած մամուլի ասուլիսում։

Գերմանիայի կանցլերը նաև ընդգծել է, որ երկու կողմերը քննարկել են նաև վերականգնվող էներգիայի աղբյուրների զարգացումը և ջրածնի օգտագործումը։

«Ավելին, մենք կառուցողական բանակցություններ ենք վարում Ադրբեջանի առաջարկի ներդրումային ծրագրի վերաբերյալ։ Այս ծրագիրը կարող է նոր հնարավորություններ բացել գերմանական ընկերությունների համար Ադրբեջանում», - նշել է նա։

Մերցի խոսքով՝ Հարավային Կովկասը նաև ավելի ու ավելի կարևոր է դառնում որպես Եվրոպայի և Ասիայի միջև կապող օղակ։ «Նոր տրանսպորտային և առևտրային միջանցքները ստեղծում են տնտեսական ներուժ, որը մենք ցանկանում ենք միասին բացահայտել», - ասել է Գերմանիայի կանցլերը։