Մոլդովան ցանկանում է մնալ ԱՊՀ շրջանակներում կնքված 17 միջազգային պայմանագրերի անդամ

Մոլդովան ցանկություն է հայտնել մնալ ԱՊՀ շրջանակներում գործող 140 միջազգային պայմանագրերից միայն 17-ի կողմ։ Այդ պայմանագրերը վերաբերում են տնտեսությանը, հանցագործության դեմ պայքարին և սոցիալական հարցերին։ Այս մասին հայտարարել է ԱՊՀ գործադիր կոմիտեի իրավաբանական բաժնի տնօրեն Լարիսա Զաուդալսկայան ԱՊՀ տնտեսական խորհրդի տնտեսական հարցերի հանձնաժողովի նիստում։

«140 միջազգային պայմանագրերից, որոնց կողմ կարող էին մնալ, նրանք ցանկություն են հայտնել մնալ միայն 17-ի կողմ։ Այստեղ մարդու իրավունքների պաշտպանությանը վերաբերող փաստաթղթերը չեն նշվում։ Առաջին և ամենակարևոր հարցն այն է, որ նրանք խնդրում են մնալ Ազատ առևտրի գոտու մասին համաձայնագրի կողմ», - ասել է Զաուդալսկայան Մոսկվայում ԱՊՀ գործադիր կոմիտեում կայացած նիստում։

Փաստաթղթերի ցանկում ներառված են նաև մշակութային արժեքների գողության, տրանսպորտային միջոցների գողության, թմրանյութերի ապօրինի շրջանառության և հանցագործության դեմ պայքարի, երկաթուղային կազմի տեխնիկական վերազինման և թարմացման, միգրանտ աշխատողների սոցիալական պաշտպանության և Հայրենական մեծ պատերազմի մասնակիցների համար արտոնությունների և երաշխիքների ճանաչման վերաբերյալ համաձայնագրեր։