Արարատի մարզում «մահաբեր» անունը ստացած Վեդիի կամուրջն ապամոնտաժվում է․ կկառուցվի նորը

Երևան-Երասխ ավտոճանապարհին գտնվող, ժողովրդին հայտնի Վեդիի կամրջի ապամոնտաժման աշխատանքները մեկնարկել են։ Այս մասին հայտնում է ֆոտոլրագրող Գագիկ Շամշյանը։

Տարիներ շարունակ վթարային վիճակում գտնվող կամրջի հիմնանորոգման անհրաժեշտության մասին բարձրաձայնել էին տեղի բնակիչները։ Կատարված ուսումնասիրությունների արդյունքում որոշվել է, որ կամրջի վերանորոգումը նպատակահարմար չէ, և դրա փոխարեն կկառուցվի նոր կամուրջ։

Ապամոնտաժման աշխատանքների ընթացքում երթևեկության անվտանգությունն ապահովում են ՀՀ ՆԳՆ ոստիկանության Պարեկային ծառայության Արարատի մարզի գումարտակի պարեկները։ Շինարարներն ընդգծել են, որ նոր կամուրջը կկառուցվի ժամանակակից չափանիշներին համապատասխան՝ ապահովելով երկարաժամկետ շահագործում։

Ֆոտոլրագրողի հետ զրույցում կամրջի վրա շինարարություն կատարող աշխատակիցներն ասում էին. «Եթե պարեկները չլինեն, կան որոշ վայ հետաքրքրասեր վարորդներ, որ մեքենաները կայանում են ու ստեղծում անհարմար վիճակ։ Բայց լավ է, երբ պարեկ է լինում, ոչ ոք չի համարձակվում մեքենան կայանել, ինչը հեշտացնում է մեր աշխատանքը։ Իսկ մենք էլ խոստանում ենք, որ ապահովելու ենք որակ, որ մեր կառուցած կամուրջը 100 տարուց ավելի շահագործվելու է։ Չենք ուզում փնովել Սովետին, բայց էդ մարդկանց կառուցած կամուրջը 60 տարուց ավելի իր գործն արել է, իսկ հիմա այն պիտի ապամոնտաժվի, որովհետև նույնիսկ սյուներ են քայքայվել»։