Անահիտ Մանասյանն այցելել է ՀՀ պետական սահմանի Ագարակ անցման կետ

Սյունիքի մարզ կատարած աշխատանքային այցի շրջանակում Մարդու իրավունքների պաշտպան Անահիտ Մանասյանը հուլիսի 22-ին այցելել է Հայաստանի Հանրապետության պետական սահմանի Ագարակ անցման կետ։ Այս մասին հայնում են ՀՀ Մարդու իրավունքների պաշտպանի գրասենյակից:

Պաշտպանը շրջայց է կատարել տարածքում, ծանոթացել անցակետի գործունեությանը, սահմանահատման գործընթացների կազմակերպմանը և այդ ընթացքում անձանց իրավունքների ապահովմանն ուղղված աշխատանքներին։ Քննարկվել են սահմանահատման ընթացքում մարդու իրավունքների պաշտպանությանն առնչվող հարցեր, այդ թվում՝ միջազգային պաշտպանության կարիք ունեցող և ապաստան հայցող անձանց իրավունքների ապահովման խնդիրները։

Անահիտ Մանասյանը կարևորել է սահմանային անցակետերում մարդու իրավունքների պաշտպանության միջազգային չափանիշների պահպանումը՝ ընդգծելով, որ յուրաքանչյուր անձ պետք է հնարավորություն ունենա իրացնելու իր հիմնարար իրավունքները՝ անկախ քաղաքացիությունից կամ իրավական կարգավիճակից։

Այցի ընթացքում քննարկվել են նաև սահմանահատման գործընթացների կատարելագործման, քաղաքացիների իրավունքների արդյունավետ պաշտպանության և պետական մարմինների միջև համագործակցության ամրապնդմանն առնչվող հարցեր։ Պաշտպանը կարևորել է ԱԱԾ Սահմանապահ զորքերի հետ արդյունավետ համագործակցությունը՝ ընդգծելով, որ այն նպաստում է առկա խնդիրների արագ լուծմանը։

Մարդու իրավունքների պաշտպանը շարունակելու է իր սահմանադրական մանդատի շրջանակում հետևողական ուշադրության կենտրոնում պահել սահմանային անցակետերում մարդու իրավունքների պաշտպանությանն առնչվող հարցերը՝ նպաստելով միջազգային չափանիշներին համապատասխան իրավունքահեն գործելակերպի ամրապնդմանը