Հայաստանի հարավում իրականացվել է բեզոարյան այծերի հաշվառման գործընթաց

Բնության համաշխարհային հիմնադրամ Հայաստանի կողմից՝ հունիսի 15-ից հուլիսի 7-ն ընկած ժամանակահատվածում  իրականացվել են բեզոարյան այծերի հաշվարկման աշխատանքներ՝ «Խոսրովի անտառ» պետական արգելոց» ՊՈԱԿ-ում, «Զանգեզուր» կենսոլորտային համալիր» ՊՈԱԿ-ի ենթակայությամբ գործող բնության հատուկ պահպանվող տարածքներում, այդ թվում՝  «Արևիք» ազգային պարկում, «Զանգեզուր» և «Խուստուփ» պետական արգելավայրերում, «Արփա» պահպանվող լանդշաֆտում և «Հայանտառ» ՊՈԱԿ-ի Կապանի անտառտնտեսություն մասնաճյուղում։ Այս մասին հայտնում է ՇՄ նախարարությունը։

Բեզոարյան այծերի հաշվառման գործընթացն իրականացվել է Հայաստանի հարավում՝ «Ընձառյուծի պահպանությունը Հայաստանում» ծրագրի շրջանակներում: Հաշվառման գործընթացին մասնակցել են նաև վերոնշյալ կազմակերպությունների մասնագետները։

Հաշվառումները նպատակաուղղված էին նախապես ընտրված հաշվառման տեղամասերում գրանցել բեզոարյան այծերի էգերի և ձագերի քանակը, ինչպես նաև դրանց հարաբերակցությունը։ Ստացված տվյալները կամփոփվեն և կհամեմատվեն նույն տեղամասերում 2026 թվականի նոյեմբեր-դեկտեմբերին նախատեսվող հաջորդ հաշվառումների արդյունքների հետ, հնարավորություն ընձեռնելով  գնահատել բեզոարյան այծի պոպուլյացիայի փոփոխություններն՝ Ընձառյուծի ապրելավայրերում։