Մարմաշենում կստեղծվի «Կանաչ տեխնոլոգիաների հաբ». Կառավարությունն ուղղակի վաճառքով համայնքային հողամաս կտրամադրի

Կառավարությունը նախատեսում է Շիրակի մարզի Ախուրյան համայնքի Մարմաշեն գյուղում գտնվող՝ 0.52 հեկտար մակերեսով համայնքային հողամասը ուղղակի վաճառքով տրամադրել «Գյումրիի տեղեկատվական տեխնոլոգիաների կենտրոն» գիտակրթական հիմնադրամին։ Որոշման նախագիծը պայմանավորված է «Կրթական կենտրոնի նյութատեխնիկական ապահովում» ծրագրի իրականացմամբ, որի շրջանակում նախատեսվում է զարգացնել կրթական ենթակառուցվածքներ: Այդ մասին որոշման նախագիծը Կառավարության՝ հուլիսի 23-ի նիստին ներկայացրեց ՏԿԵ նախարար Դավիթ Խուդաթյանը:

«Հիմնադրամը նախատեսում է իրականացնել տվյալ տարածքում բարեգործական ծրագիր, մասնավորապես՝ կանաչ տեխնոլոգիաների հաբի հիմնում, ինչը կրթական կենտրոն է լինելու: Պլանավորվում է նաև կառուցել տեխնոլոգիական 6 կացարան, որոնք հագեցված են լինելու ժամանակակից սարքավորումներով, գործիքներով, ներառյալ՝ դրոններով:

Պայմանավորվածության համաձայն՝ անվճար հիմունքներով հիմնադրամը ներգրավելու է Ախուրյան և հարակից համայնքների հատկապես գյուղական բնակավայրերի կանանց և երիտասարդներին իրենց տեղեկատվական և տեխնոլոգիական ծրագրերում՝ ներառյալ տեխնոլոգիական պրոդուկտների ստեղծման աշխատանքներում: Արդյունքում 5 նոր, սկսնակ ընկերություններ պիտի ստեղծվեն:

Հաջորդ պլանավորումն այն է, որ տրանսպորտով են ապահովվելու բոլոր այն մարդիկ, որոնք իրենց բնակավայրից պիտի տեղափոխվեն կրթական կենտրոն այս ծրագրերի շրջանակներում:

Ընդհանուր ծրագիրը նախատեսված է մինչև 2028 թվականի դեկտեմբերի 31-ը, և նախատեսված է շուրջ 100 մլն դրամի ներդրում»,- ասաց նախարարը:

ԿԳՄՍ նախարար Ժաննա Անդրեասյանն արձագանքեց՝ ֆորմալ կրթությունը պետք է անպայման լրացվի ոչ ֆորմալ կրթական միջավայրերով, որովհետև մարդիկ սովորում են ոչ միայն դպրոցում, քոլեջում, բուհում, այլև իրենց կյանքի յուրաքանչյուր պահին՝ տարբեր միջավայրերում:

«Այսօր տեխնոլոգիական կրթությունը դարձել է մեր կրթական համակարգի բրենդը, և մենք ունենք բազմաթիվ հաջողված տեխնոլոգիական ոչ ֆորմալ կրթության օրինակներ, որոնք մեծ հետաքրքրություն են առաջացնում նաև Հայաստանից դուրս, ինչպես «Թումոն» է, «Արմատ» լաբորատորիաներն են, որոնք գործում են 600-ից ավելի դպրոցներում որպես մեր ոչ ֆորմալ կրթության հաջողված օրինակ: Նմանատիպ հետաքրքրություն առաջացնում է նաև COAF-ը»,- ասաց նախարարը՝ հավելելով, որ նոր ծրագիրը հասանելի է լինելու նաև ավագ դասարանների աշակերտներին: