ԲՏԱ նախարարությունն ու GIZ-ը համատեղ կազմակերպել են կիբեռանվտանգության դասընթացներ

Հասարակություն 23 Հուլիս, 2026 13:26

ՀՀ բարձր տեխնոլոգիական արդյունաբերության նախարարության և Գերմանական միջազգային համագործակցության գործակալության (GIZ) համատեղ նախաձեռնությամբ իրականացվել են կիբեռանվտանգության իրազեկման քառօրյա դասընթացներ, որին մասնակցել են ԲՏԱ նախարարության, Ռազմարդյունաբերության կոմիտեի, նախարարությանը ենթակա կազմակերպությունների աշխատակիցներ։ Այս մասին հայտնում են ՀՀ բարձր տեխնոլոգիական արդյունաբերության նախարարությունից:

Մասնակիցներն ուսումնասիրել են կիբեռանվտանգությանն ու թվային անվտանգությանը վերաբերող մի շարք առանցքային թեմաներ։ Մասնավորապես, անդրադարձ է կատարվել տեխնոլոգիաների միջոցով իրականացվող հարձակումներին, սոցիալական ինժեներիային և ֆիշինգին, հղումների ու կայքերի անվտանգության ստուգմանը, ինչպես նաև MS Office 365 միջավայրի անվտանգ և արդյունավետ օգտագործմանը:

Դասընթացը ներառել է և՛ տեսական, և՛ գործնական հատվածներ։ Դիտարկվել են տարբեր օրինակներ իրական կյանքից, հնարավոր միջադեպեր, և յուրաքանչյուրի համար քննարկվել են թույլատրվող/արգելված գործողությունները, արագ արձագանքման քայլերը, ինչպես նաև յուրաքանչյուր բաժնի պարտավորությունները։

Դասընթացի ավարտին իրականացվել է նաև մասնակիցների ձեռք բերած գիտելիքների ստուգում։

Վերապատրաստման ծրագիրը կազմակերպվել էր Գերմանիայի արտաքին գործերի նախարարության և Եվրոպական միության աջակցությամբ իրականացվող «Համագործակցություն հանուն կիբեռանվտանգության ամրապնդման» ծրագրի շրջանակում։

Ծրագրի նպատակն էր բարձրացնել մասնակիցների իրազեկվածությունը կիբեռանվտանգության արդի սպառնալիքների վերաբերյալ, զարգացնել անվտանգ թվային գործելակերպի հմտությունները և նպաստել MS Office 365 գործիքների անվտանգ կիրառմանը աշխատանքային գործընթացներում