Իրավապաշտպան կազմակերպությունները ԵԱՀԿ գլխավոր քարտուղարից պահանջում են պարզաբանել Կաթողիկոսի վերաբերյալ հայտարարությունները

Քաղաքական իրավունքների հայկական կենտրոնը, Հայաստանի Հելսինկյան կոմիտեն, Եվրոպայում կրոնի ազատության ֆորումը և Միջազգային քրիստոնեական համերաշխությունը (Christian Solidarity International) համատեղ հայտարարությամբ խորը մտահոգություն են հայտնել ԵԱՀԿ գլխավոր քարտուղար Ֆերիդուն Հ. Սինիրլիօղլուի՝ հրապարակված հեռախոսազրույցում հնչեցրած արտահայտությունների կապակցությամբ։

Հայտարարության հեղինակների պնդմամբ՝ գլխավոր քարտուղարը պատրաստակամություն է հայտնել ուսումնասիրել, թե ինչպես ԵԱՀԿ-ն կարող է աջակցել Հայաստանի իշխանություններին Ամենայն Հայոց Կաթողիկոս Գարեգին Բ-ի պաշտոնանկության հարցում։ Իրավապաշտպանները նշում են, որ նման դիրքորոշումն անհամատեղելի է ԵԱՀԿ-ի՝ կրոնի ազատության և մարդու հիմնարար իրավունքների պաշտպանության առաքելության հետ։

Նրանք կոչ են անում Ֆերիդուն Սինիրլիօղլուին հրապարակայնորեն պարզաբանել և չեղարկել ցանկացած ակնարկ, թե ԵԱՀԿ-ն կարող է ներգրավվել Հայ Առաքելական Սուրբ Եկեղեցու ներքին կառավարման հարցերում, վերահաստատել կազմակերպության հանձնառությունը կրոնի ազատության պաշտպանության նկատմամբ և երկխոսություն սկսել Ամենայն Հայոց Կաթողիկոսի հետ՝ եկեղեցու և հավատացյալների իրավունքների լիարժեք պաշտպանության նպատակով։