Ֆրանսիայում անտառային հրդեհների պատճառով շուրջ 20 հազար մարդ է տարհանվում

Ֆրանսիայի հարավ-արևմուտքի Ժիրոնդի շրջանում ծավալվող մեծամասշտաբ անտառային հրդեհների պատճառով շուրջ 12 հազար մարդ արդեն իսկ տարհանվել է, իսկ պատսպարման նպատակով իշխանությունները պատրաստվում են անվտանգ վայրեր տեղափոխել ևս 8,800 բնակչի։ Այս մասին տեղեկացնում է BBC-ն։

Տեղի նահանգապետ Սոֆի Բրոկասը հայտնել է, որ Արկաշոնի ծոցի հարակից տարածքներում կրակն արդեն լրիվ ոչնչացրել է ավելի քան 2,400 հեկտար հողատարածք։ Տարհանման ենթարկվածների հիմնական մասը Լեժ-Կապ-Ֆերե թերակղզու ճամբարներում գտնվող այցելուներն են, իսկ վերջին տեղափոխումներն իրականացվում են Կլաուեյ գյուղի ճամբարային հատվածներից՝ կանխարգելիչ քայլերի շրջանակում։ Պաշտոնական տվյալներով՝ տուժածներ և զոհեր չկան, սակայն մի շարք ավտոճանապարհներ փակվել են, իսկ հրշեջ ծառայողները շարունակում են պայքարը բարձր ջերմաստիճանի և ուժգնացող քամու պայմաններում։

Հրդեհների ալիքը վերջին օրերին տարածվել է նաև Իսպանիայում և Իտալիայում։ Սիցիլիայում արձանագրվել է ավելի քան 350 հրդեհ, որոնցից 10-ը՝ խոշոր, ինչի հետևանքով կատարվել են նախազգուշական տարհանումներ։ Հրդեհաշիջման աշխատանքների ընթացքում զոհվել է տեղի հրշեջներից մեկը, իսկ ևս մեկը տեղափոխվել է հիվանդանոց։ Իսպանիայում՝ Տոլեդոյի մոտակայքում բռնկված հրդեհների հետևանքով այրվել է շուրջ 890 հեկտար տարածք, թեև կրակի հետագա տարածումը հաջողվել է կանխել։ Միևնույն ժամանակ Գվադալախարայի շրջանում ընթացիկ տարվա ամենախոշոր հրդեհն արդեն ոչնչացրել է ավելի քան 35 հազար հեկտար տարածք։

Եվրոպայում պահպանվող բարձր ջերմաստիճանի ֆոնին «Կոպեռնիկուս» կլիմայի փոփոխության ծառայությունը հիշեցնում է, որ մայրցամաքը շարունակում է մնալ աշխարհում ամենաարագ տաքացող տարածաշրջանը, իսկ անտառային հրդեհների հետևանքով այրված տարածքները 2025 թվականին հասել են ռեկորդային ցուցանիշի։