Լեհաստանը առաջարկել է Ուկրաինայի հետ համատեղ արտադրել Patriot հրթիռներ

Լեհաստանը Միացյալ Նահանգներին առաջարկել է Ուկրաինայի հետ համատեղ արտադրել Patriot հրթիռներ «անվտանգ վայրում», - Պենտագոնում կայացած բանակցություններից հետո լրագրողներին ասել է պաշտպանության փոխնախարար Մագդալենա Սոբկովյակ-Չարնեցկան։

«Մենք քննարկել ենք ԱՄՆ նախագահ Դոնալդ Թրամփի ասածը ՆԱՏՕ-ի`՝ Անկարայում կայացած գագաթնաժողովի ժամանակ, մասնավորապես՝ նրա հայտարարությունը, որ Ուկրաինայում կքննարկվի Patriot հրթիռների արտադրության գործարանի ստեղծումը», - ասել է Սոբկովյակ-Չարնեցկան Polsat հեռուստաընկերությամբ հեռարձակված մամուլի ասուլիսում։

«Լեհական առաջարկը, որը ես այսօր ներկայացրել եմ, անդրադառնում է ամերիկյան կողմի մտահոգություններին։ Մենք առաջարկել ենք, որ այս հարցի շուրջ համագործակցությունը կարող է իրականացվել Միացյալ Նահանգների, Ուկրաինայի և Լեհաստանի եռանկյունու շրջանակներում», - ասել է Լեհաստանի պաշտպանության նախարարության խոսնակը։ «Գաղափարն այն է, որ արտադրությունը տեղի ունենա անվտանգ վայրում», - պարզաբանել է նա։

Ամերիկացի առաջնորդը նախկինում հայտարարել էր, որ Վաշինգտոնը Կիևին կտրամադրի Patriot հակաօդային պաշտպանության համակարգի համար հրթիռներ արտադրելու լիցենզիա։ Bloomberg-ը հայտնել է, որ Patriot հակաօդային պաշտպանության համակարգի համար խափանող հրթիռների հնարավոր արտադրության մեկնարկը Ուկրաինայում երկար ժամանակ կպահանջի և կխանգարի Կիևին արագորեն համալրել իր զինանոցը։