Տիեզերքի հետ կապը՝ վտանգի առաջ․ NASA-ի աշխատակիցներին տարհանել են Մադրիդից անտառային հրդեհների պատճառով

Իսպանիայի Մադրիդ ինքնավար համայնքում անտառային հրդեհների պատճառով տարհանվել է NASA-ի տիեզերական կապի կենտրոնի մոտ 100 աշխատակից, հաղորդում է El Pais-ը։ Կենտրոնը գտնվում է Ռոբլեդո դե Չավելա քաղաքում։

«Իրավիճակը շատ բարդ է։ Մենք չգիտենք՝ հրդեհը ազդե՞լ է կենտրոնի կառույցների վրա, քանի որ ներսում ոչ ոք չկա», - բացատրել է կենտրոնի աշխատակից Լոլա Կադիերնոն։ Նա պնդել է, որ համալիրի աշխատակիցներից ոչ մեկը չի տուժել։

Ըստ El Mundo թերթի՝ Մադրիդ համայնքում և Ավիլա նահանգում (Կաստիլիա և Լեոն ինքնավար համայնքում) բռնկված անտառային հրդեհների պատճառով տարհանվել է ավելի քան 40,000 մարդ։

Եվս 20,000 մարդու հրահանգվել է մնալ իրենց տներում։ Հրդեհների պատճառով մի շարք ճանապարհներ փակվել են։ Հրդեհները, որոնք կարող են ընդգրկել մոտ 20,000 հեկտար ընդհանուր տարածք, դեռևս չեն մարվել։

Ավելի վաղ իշխանությունները արտակարգ դրություն էին հայտարարել Մադրիդ համայնքում և Ավիլա նահանգում՝ անտառային հրդեհների պատճառով։