Ավստրալիայում ծրագրում են վերականգնել նացիստական Գերմանիայի առաջնորդներից մեկի «Մերսեդես»-ը

Ավստրալիայի Բրիսբեն քաղաքի արհեստանոցում սկսում են լայնածավալ վերականգնողական նախագիծ․ նախատեսվում է կյանքի վերադարձնել, հավանաբար, վերջին «Մերսեդես»-ը, որն օգտագործել է նացիստական Գերմանիայի ռեյխսմարշալ Հերման Գյորինգը։ Mercedes 540 K մոդելի էլեգանտ կաբրիոլետը նախատեսված է եղել պետական այցերի և հանդիսավոր երթերի համար։

Երկրորդ համաշխարհային պատերազմի ավարտից հետո ավտոմեքենան բռնագրավվել էր ԱՄՆ բանակի կողմից։ Սկզբում դրանով երթևեկում էին ամերիկացի զինվորները, իսկ ավելի ուշ այն տեղափոխեցին ԱՄՆ, որտեղ մեքենան տասնամյակներ շարունակ մնաց մեկ սեփականատիրոջ մոտ և խարխլվեց։ Երբ 13 տարի առաջ դասական ավտոմեքենաների գծով մասնագիտացած դիլերներն իմացան մեքենայի պատմությունը, նրանք Հյուսիսային Կարոլինայում հայտնաբերեցին միայն ժանգոտած դետալների մի կույտ։

Սկզբում նախատեսվում էր վերականգնել «Մերսեդես»-ը ԱՄՆ-ում, սակայն դա այդպես էլ տեղի չունեցավ։ Փոխարենը ապամոնտաժված «Մերսեդես»-ն ի վերջո հայտնվեց Ավստրալիայում՝ Բրիսբենի Sleeping Beauties Restoration արհեստանոցում։ Վերականգնումը դարձել է հսկայական խնդիր։

Ակնկալվում է, որ վերականգնումը կտևի չորսից հինգ տարի։ Շատ մասեր այլևս չեն արտադրվում, ուստի դրանք պետք է նորից պատրաստել ձեռքով՝ հենվելով պատմական բնութագրերի վրա։ Փորձագետները «Մերսեդես»-ի արժեքը գնահատում են 1,5-ից 2 միլիոն եվրոյի սահմաններում, չնայած իր հակասական պատմության պատճառով ավտոմեքենան շատ հավաքորդների համար կարող է դառնալ խնդրահարույց ձեռքբերում։