Նվազել են հրազենի գործադրմամբ կատարված, ինչպես նաև առանձնապես ծանր և ծանր հանցագործությունները․ՆԳՆ

Հուլիսի 20-ին Կոտայքի մարզում ՆԳ նախարար Արփինե Սարգսյանի գլխավորությամբ ամփոփվել է ՆԳՆ ոստիկանության 2026 թվականի առաջին կիսամյակի աշխատանքը։ Ներկայացվել են մարզային ստորաբաժանումների՝ Քրեական և Համայնքային ոստիկանության, Պարեկային ծառայության, ինչպես նաև Ոստիկանության գվարդիայի իրականացրած աշխատանքներն ու արդյունքները։ Այս մասին հայտնում են ՆԳՆ-ից։

2026 թվականի առաջին կիսամյակում Կոտայքի մարզում քրեական ոստիկանության գործառույթներին վերաբերելի արձանագրվել է 240 հանցագործություն՝ նախորդ տարվա նույն ժամանակահատվածի համեմատ 8 տոկոսով պակաս։ Նվազել են հրազենի գործադրմամբ կատարված, ինչպես նաև առանձնապես ծանր և ծանր հանցագործությունները։ Բացահայտվել են սպանության և սպանության փորձի բոլոր դեպքերը, ինչպես նաև սպանության նախապատրաստության մեկ դեպք։

Հաշվետու ժամանակահատվածում մարզում աճել են հասարակական անվտանգության, կարգի և բնակչության առողջության դեմ ուղղված հանցագործությունները, ինչը հիմնականում պայմանավորված է եղել առանց վարորդական իրավունքի տրանսպորտային միջոց վարելու դեպքերի հայտնաբերմամբ։

Համայնքային ոստիկանության ստորաբաժանումներում ևս արձանագրվել են տարբեր ցուցանիշներ։ Հրազդանի բաժնում գրանցվել է 363 հանցագործություն, բացահայտման արդյունավետությունը կազմել է 87,1 տոկոս։ Կոտայքի բաժնում հանցագործությունների թիվը նվազել է 20,1 տոկոսով, իսկ բացահայտման արդյունավետությունը կազմել է 82,8 տոկոս։ Գառնիի բաժնում գրանցվել է 162 դեպք, բացահայտման արդյունավետությունը հասել է 93,2 տոկոսի։ Նաիրիի բաժնում գրանցվել է 258 դեպք, իսկ բացահայտման արդյունավետությունը կազմել է 90,3 տոկոս։ Չարենցավանի բաժնում արձանագրվել է 157 դեպք, որոնցից բացահայտվել է 139-ը։

Պարեկային ծառայության Կոտայքի մարզի գումարտակի ծառայողները բացահայտել են 153 հանցագործության դեպք, իսկ վարչական իրավախախտումների վերաբերյալ կազմվել է 56 139 արձանագրություն։ Միաժամանակ աճել են ճանապարհատրանսպորտային պատահարները, սակայն նվազել են դրանց հետևանքով զոհերի թիվը։

Ամփոփելով աշխատանքը՝ Արփինե Սարգսյանը շնորհակալություն է հայտնել ոստիկանության ծառայողներին և հանձնարարել ուժեղացնել հանցագործությունների կանխարգելման ու բացահայտման աշխատանքները։ Նա կարևորել է քրեական ենթամշակույթի դեմ պայքարը, թմրամիջոցների ապօրինի շրջանառության, ընտանեկան բռնության և անչափահասների նկատմամբ կատարվող հանցագործությունների կանխարգելումը։

Նախարարը հանձնարարել է նաև ակտիվացնել ապօրինի զենք-զինամթերքի հայտնաբերման, օպերատիվ տեղեկությունների թարմացման, ինչպես նաև համայնքներում կանխարգելիչ միջոցառումների իրականացումը։ Կարևորվել է քաղաքացիների ահազանգերին արագ արձագանքելու և հանրային անվտանգության մակարդակի բարձրացման անհրաժեշտությունը։