ՌԴ ԱԴԾ-ն Պավել Դուրովի նկատմամբ միջազգային հետախուզում է հայտարարել

Ռուսաստանի Անվտանգության դաշնային ծառայությունը (ԱԴԾ) հայտարարել է, որ Telegram մեսենջերի հիմնադիր Պավել Դուրովի նկատմամբ հարուցվել է քրեական գործ՝ ահաբեկչությանը աջակցելու մեղադրանքով, և նրա նկատմամբ միջազգային հետախուզում է հայտարարվել։

ԱԴԾ-ի հաղորդմամբ՝ Telegram-ի ղեկավարությունը չի հեռացրել այն ալիքները, չաթերն ու բոտերը, որոնք, ռուսական հատուկ ծառայությունների պնդմամբ, օգտագործվել են Ուկրաինայի հատուկ ծառայությունների կողմից՝ Ռուսաստանի տարածքում ահաբեկչական գործողություններ և զանգվածային սպանություններ նախապատրաստելու նպատակով։

Ռուսական կողմը նշում է, որ Telegram-ի միջոցով կազմակերպված գործողությունների հետևանքով կան բազմաթիվ զոհեր, այդ թվում՝ կանայք և երեխաներ, ինչպես նաև պատճառվել է բազմամիլիարդանոց նյութական վնաս։

ԱԴԾ-ի տվյալներով՝ Ուկրաինայի հատուկ ծառայությունների ներկայացուցիչները Telegram-ի «Դայվինչիկ» ծառայության միջոցով աղջիկների անվան տակ ծանոթացել են ռուսաստանցի երիտասարդների հետ և խաբեությամբ ներգրավել նրանց ահաբեկչական գործունեության մեջ։

Ծառայությունը նաև հայտնել է, որ 2025 թվականի հուլիսից ի վեր Ռուսաստանի 16 շրջաններում ձերբակալվել է «Դայվինչիկ»-ի 46 երիտասարդ օգտատեր, որոնք, ըստ ԱԴԾ-ի, Ուկրաինայի հատուկ ծառայությունների հանձնարարությամբ հարձակումներ են իրականացրել ոստիկանների նկատմամբ և մասնակցել հրկիզումների։