Փոխվարչապետը ընդունել է Ֆրանսիայի դեսպանին՝ դիվանագիտական առաքելության ավարտի կապակցությամբ

Այսօր փոխվարչապետ Տիգրան Խաչատրյանը ընդունել է Հայաստանում Ֆրանսիայի Հանրապետության արտակարգ և լիազոր դեսպան Օլիվիե Դըկոտինյիին՝ նրա դիվանագիտական առաքելության ավարտի կապակցությամբ։

Փոխվարչապետը բարձր է գնահատել վերջին տարիներին Հայաստան-Ֆրանսիա հարաբերությունների ակտիվ և դինամիկ զարգացումը՝ շնորհակալություն հայտնելով դեսպանին երկկողմ գործընկերության ամրապնդման գործում ունեցած անձնական ներդրման համար։ Նրա խոսքով՝ համատեղ աշխատանքի արդյունքում ձևավորվել է ամուր հիմք, որը կարևոր է համագործակցության հետագա զարգացման համար։

Օլիվիե Դըկոտինյին իր հերթին շնորհակալություն է հայտնել Տիգրան Խաչատրյանին վերջին տարիների արդյունավետ համագործակցության և երկկողմ հարաբերությունների համար կարևոր նախաձեռնությունների առաջմղման համար։

Հանդիպման ընթացքում քննարկվել են նաև Հայաստան-Ֆրանսիա համագործակցության օրակարգի մի շարք ուղղություններ՝ էներգետիկա, ենթակառուցվածքներ, արտահանման դիվերսիֆիկացիա և այլ ոլորտներում իրականացվող աշխատանքներ։