Օգտատերերին կոչ են արել ժամանակավորապես չկատարել ֆինանսական գործարքներ Telegram-ում

Ռուսաստանի Պետդումայի տեղեկատվական քաղաքականության հանձնաժողովի նախագահի տեղակալ Անդրեյ Սվինցովը քաղաքացիներին խորհուրդ է տվել մինչև Ռոսկոմնադզորի և Ռուսաստանի ԱԴԾ-ի պաշտոնական պարզաբանումները զերծ մնալ Telegram-ում ֆինանսական գործարքներ կատարելուց։ Այդ մասին նա հայտարարել է «Говорит Москва» ռադիոկայանին տված հարցազրույցում։

Պատգամավորի խոսքով՝ ներկայում հավելվածում վճարովի բաժանորդագրությունների, «աստղերի» կամ նվերների գնումը կարող է որոշակի ռիսկեր պարունակել։ Միևնույն ժամանակ նա նշել է, որ չի կարծում, թե նման վճարումները կհամարվեն ահաբեկչության ֆինանսավորում, սակայն խորհուրդ է տվել սպասել պետական մարմինների պաշտոնական դիրքորոշմանը։

Սվինցովը նաև հայտարարել է, որ տեսականորեն հնարավոր է Telegram-ի կարգավիճակի վերաբերյալ նոր որոշումների ընդունումը։ Միաժամանակ այս պահին նման որոշում պաշտոնապես չի կայացվել, իսկ պատգամավորի հայտարարություններն արտացոլում են նրա անձնական գնահատականը։