ՄԱԿ-ի փորձագետները հաստատել են՝ Reuters-ի հետաքննության մեջ հիշատակված Boeing ինքնաթիռները զենք են տեղափոխել Սուդանի ԱԱՕ-ին

ՄԱԿ-ի փորձագետները նախնական զեկույցում եզրակացրել են, որ Reuters-ի հետաքննության մեջ հիշատակված Boeing 727 ինքնաթիռները զենք, անօդաչու թռչող սարքեր և վարձկաններ են տեղափոխել Սուդանի Արագ արձագանքման ուժերի (RSF) համար։ Զեկույցը, որը նախատեսվում է հրապարակել սեպտեմբերին, հիմնված է ականատեսների ցուցմունքների և ՄԱԿ-ի անդամ պետությունների տրամադրած տեղեկությունների վրա։ Հաղորդվում է նաև, որ օդանավերը, հավանաբար, դիտավորյալ խուսափել են թռիչքների հայտնաբերումից։

Ըստ Reuters-ի՝ հիշյալ ինքնաթիռները կապվում են ԱՄՆ բանակի հատուկ նշանակության նախկին զինծառայող և ռազմական կապալառու Սթիվեն Շոլիսի բիզնես ցանցի հետ։ Սակայն գործակալությունը նշում է, որ չի հայտնաբերել ապացույցներ, թե Շոլիսը կամ նրա ընկերությունները ենթարկվել են պատժամիջոցների կամ պաշտոնապես մեղադրվել են որևէ իրավախախտման մեջ։ Ինքը՝ Շոլիսը, հրաժարվել է մեկնաբանել ՄԱԿ-ի զեկույցը, իսկ RSF-ը չի արձագանքել հարցումներին։

Զեկույցում նաև նշվում է, որ 2025 թվականին Սուդանի Դարֆուրի շրջանում RSF-ի կողքին գործել են Կոլումբիայից ժամանած վարձկաններ, որոնց, ըստ ՄԱԿ-ի փորձագետների, վարձել է Արաբական Միացյալ Էմիրություններում գրանցված Global Security Services Group (GSSG) ընկերությունը։ Միաժամանակ ԱՄԷ-ի ներկայացուցիչները հայտարարել են, որ անցկացված ստուգումների արդյունքում GSSG-ի մասնակցությունը Սուդանում վարձկանների գործունեությանը չի հաստատվել, և ընկերությունը գործում է երկրի օրենսդրության ու միջազգային իրավունքի շրջանակում։