Մահացել է դոկտոր, պրոֆեսոր Սոկրատ Խանյանը

Մահացել է արցախցի դասախոս, մեծ մտավորական, բանաստեղծ, թարգմանիչ, գրականագետ, հրապարակախոս, բանասիրական գիտությունների դոկտոր, պրոֆեսոր Սոկրատ Աղալարի Խանյանը։ Նա ծնվել է 1930 թ. հունվարի 22-ին Լեռնային Ղարաբաղի Հանրապետության Հադրութի շրջանի այժմ՝ Ակնաղբյուր գյուղում։

Մահազդը հայտնել են  «Նորություններ Արցախից» ֆեյսբուքյան էջում.

«Անգնահատելի է այն ժառանգությունը, որ նա թողեց հայ գրականությանը, գիտությանը և իր սաների հոգիներում։ Նրա իմաստուն խոսքը, մարդկային նկարագիրը, նվիրվածությունն ու ազնվությունը երկար տարիներ լույսի պես ուղեկցելու են բոլոր նրանց, ովքեր երջանկություն են ունեցել ճանաչելու և սովորելու նրանից։

Այսօր մենք հրաժեշտ ենք տալիս ոչ միայն սիրված դասախոսի, այլև մի մեծ մարդու, որի անունը միշտ կապվելու է արժանապատվության, գիտելիքի և հայրենասիրության հետ։

Մեր խորին ցավակցությունն ենք հայտնում Սոկրատ Խանյանի ընտանիքին, հարազատներին, ընկերներին, աշակերտներին և բոլոր նրանց, ում սրտում նա անջնջելի հետք է թողել։

Սոկրատ Խանյանի այս բանաստեղծությունը գրվել է 2020 թվականի սեպտեմբերի 27-ին՝ պատերազմի առաջին օրը, Ստեփանակերտում։ Այն ոչ միայն այդ օրերի վկայությունն է, այլև մեր ժողովրդի կամքի, ցավի ու արժանապատվության բանաստեղծական արտահայտությունը։

Լույս, խաղաղություն և հավերժ հիշատակ նրա լուսավոր հոգուն։

* * *

Արևսարված իմ արևներ,

Դուրս եկեք նորից ,

Իմ Դավիթված նոր Դավիթներ,

Վեր ելեք հորից:

Շապուհված նոր շապուհներ են

Գալիս կրկին մեր դեմ,

Մսրա նոր-նոր մելիքներ են

Ոռնում՝ անկուշտ, անդեմ:

Հրոսակները ազերական՝

Հին մոլուցքով ցանցառ,

Աչք են տնկել արցախական

Մեր օջախին պայծառ:

Իմ Ջալալված Ջալալյաններ,

Զարկենք նենգ թշնամուն,

Պապենական օրենքն է մեր՝

Պահել օջախ ու տուն»։