ՃՈ-ն հերքել է օգոստոսի 1-ից «եվրոպրոտոկոլի» թղթային տարբերակը պարտադիր ներկայացնելու մասին լուրերը

Ռուսաստանի Պետավտոտեսչությունը (ԳԱԻ) հերքել է մի շարք լրատվամիջոցներում և սոցիալական ցանցերում տարածված տեղեկությունները, թե 2026 թվականի օգոստոսի 1-ից ճանապարհային ոստիկանության տեսուչները վարորդներից կպահանջեն ներկայացնել «եվրոպրոտոկոլի» թղթային տարբերակը։ Այդ մասին հայտնում է ՌԻԱ Նովոստին։

Գերատեսչությունը հիշեցրել է, որ Ռուսաստանի ճանապարհային երթևեկության կանոնների 2.1 կետով սահմանված է տեսուչին ներկայացվող պարտադիր փաստաթղթերի ցանկը, և ճանապարհատրանսպորտային պատահարի մասին ծանուցման («եվրոպրոտոկոլ») թղթային ձևաթուղթը այդ ցանկում ներառված չէ։ Միաժամանակ ընդգծվել է, որ ճանապարհային անվտանգության ոլորտի օրենսդրությունում նման փոփոխություններ չեն կատարվել և չեն նախատեսվում։

ԳԱԻ-ն նաև նշել է, որ իրավական ակտերում նախատեսվող բոլոր փոփոխությունները հրապարակվում են Դաշնային նախագծերի պաշտոնական պորտալում, իսկ հաստատված փաստաթղթերը՝ պաշտոնական իրավական տեղեկատվության ինտերնետային հարթակում։